2014台灣文學獎台語新詩金典獎評審感言
方耀乾
「2014台灣文學獎」台語新詩金典獎複審佮決審會議,2014年9月12日下晡兩點正佇國立台灣文學館2樓文資第3會議室舉行。評審委員有5位,分別是宋澤萊、林淇瀁(向陽)、林央敏、路寒袖、方耀乾。這屆的台灣文學獎輪著台語詩的徵選,創作行數限佇70逝以內,得獎者干焦取一名,獎金新台幣 20萬。
這屆參加徵選的詩作總共才18件,算真少,這參共今年的台南市文學獎台語詩組的參加件數52件,佮共今年的教育部台灣本土語言文學獎閩南語詩組(包括社會組72件、教師組39件、學生組30件)的參加總篇數141件,加少真濟。這可能有一個原因,就是著獎名額干焦一名爾爾,一般會認為參加的人有較濟高手,歹著獎。所致,就較少人參與。向望以後逐家莫有這種顧慮,大膽踴躍參加。
這18件詩作的主題有紀事、抒情、懷人、國族、記遊、親情等等,尤其是有關懷人的歷史人物詩上突出。人物詩是這幾年來全台灣所在文學獎常在看著的主題,變成一種流行,而且有袂少人因為寫人物詩提著獎的。這是好現象、抑是歹現象,真歹講。總是,趕流行的風氣對文學創作來講,是歹現象。書寫文學創作的人愛有開拓新主題、新形式、新技巧的大勇氣才著。
評審會議經過初審、複審,有兩首入圍:分別是5號〈知影-賴和的相思調〉佮14號〈親像,有光〉。就入圍作品,5位評審委員閣再投票,每人一票,投票結果是〈知影-賴和的相思調〉得2票,〈親像,有光〉得3票:
路寒袖:〈知影-賴和的相思調〉
宋澤萊:〈親像,有光〉
林淇瀁:〈親像,有光〉
方耀乾:〈知影-賴和的相思調〉
林央敏:〈親像,有光〉。
兩首詩各有評審支持,也各有千秋,經評審熱烈討論了後,針對這兩首詩閣再投一擺票。結果各位評審委員認為14號〈親像,有光〉對國際社會的關照,是台語詩少人開拓的面向,表示肯定,最後得著五票,14號〈親像,有光〉成做2014年台灣文學獎台語新詩金典獎得獎作品,啊5號〈知影-賴和的相思調〉不幸成做遺珠。
〈親像,有光〉是一首台語詩當中較少開拓的題材,關照國際上被集權統治的社會,書寫翁山蘇姬的生長,寫出緬甸民主自由打拚的過程,佮伊對國家的責任佮成做無驚惶的、溫柔有力的革命者。規首詩的語言風格充滿柔軟的語調,台語用詞典雅、媠氣,這佮翁山蘇姬的氣質相當有四配。這首詩就像溫溫仔的燈火仝款,國家佮民主困擾中提醒彼葩微弱光明的部分,雖然無用沉重的文字去描繪國家大事,毋過舉重若輕,非常有喉韻。
初初一看,這首詩書寫翁山蘇姬早期的生命史有淡薄機械化,毋過景物、事件佮情感的推徙像慢火,一層一層到尾葩達到高潮,最後參題目〈親像,有光〉絚絚完美連結。特別中間插三段括弧的部分,是避免詩作變成純粹書寫翁山蘇姬的傳記,第一是說明文學佮個人的生涯,第二是翁山蘇姬佮母親的關係,第三描寫翁山蘇姬熟似伊的翁,彼陣伊猶未真正投入革命事業。這看起來參伊的革命大業親像無啥關係,毋過括弧的部分佮非括弧的部分互相做對照,也同時互相結合成做有機體。後面算來的第二葩,「你相信」這句話,不只是翁山蘇姬個人相信,而且是全世界攏共同相信民主政治。對這首詩予咱感覺著希望,所以這個未來的世界「親像,有光」。這首詩用情真深,無簡單的所在是有牽挽牢了,情緒無做大水災。
2014/10/15國立台中教育大學求真樓914