這篇小說te描寫Siraya的一脈，佇小琉球的「Lamey」被剿滅的悲慘歷史，中間閣有感人的愛情故事。能評審作第一，伊的內容非常豐富，值得討論的議題多元，譬如講：老尪姨Vare的預言成真，對一個族群的「命運」佮in的抵抗，予人足濟的無奈。為著抵抗而來「運命」的一方，有英雄的描寫，譬如大斑鴿佮大頭目等的角色。In e 犧牲佮努力，成做感動人的重要元素。另外，愛情的主題佇這篇小說中也有真深刻的書寫，Salom的媠佮伊的純情，佮反倒轉命運的苦楚，成做強烈的對比。

＜金色島嶼之歌＞也有族群的議題te予人思考，紅毛、漢人佮原住民的古早社會，in有「強／弱」、「原始／文明」、「善／惡」等的互動，也透露出一寡千古不變的道理。同時，這篇小說可貴的是也有歷史象徵的意義，卑微弱小的鄉社往往成做強食著侵略的對象。回想台灣苦楚的歷史，一再受著外邦人的欺侮，一代閣一代，咱也漸漸沒法度看見屬ti咱的勇敢的大斑鴿佮大頭目囉！

這篇小說的結構是有設計的，分四節通過四個角色的自白，來予情節得著完整的鋪排。伊的文字真媠，有詩的氣味，na詩歌的旋律，非常浪漫te吟唱一首古早的哀歌。譬如講「我欲給這一切交代予山坑的椰子樹，我相信，總是有一日，有人會使聽著我的古…」、「我看見Lamey的暗影浮佇haih，親像一隻歇喘的海翁，haih呢仔溫柔閣稀微，道干那一個真歹接近的美夢…」。

免不了，這次參賽的作品攏有一寡的缺點，這篇小說也有能予大家批評的空間。總是，我相信這就是能予大家佇創作上，祈求閣較進步的所在。比賽是一時，為著台語文學來努力打拼卻是咱大家永遠的目標。