2025臺灣文學獎【台語文學創作獎〡評審觀察】陳正雄
今年答應國立臺灣文學館的邀請，擔任台語文學獎獎項的評審。接著館方寄來所有參加比賽的稿件時，我手裡有一份沉重的感覺；當我頭擺看過全部的作品了後，心內的感覺閣較沉重。這每一篇文章、每一張稿紙、甚至每一句一字，攏充滿作者的心血、努力佮向望。佇跡爾濟的作品內底，干焦會當選出三个得獎者，這个壓力確實是有夠大。
今年的評審會議是6月26日11點，佇臺北，臺灣文學館新成立的「臺灣文學糧倉」會議室舉行。評審委員有林淇瀁（向陽）、陳豐惠、莊佳穎、鄭順聰佮我。參賽的稿件：小說有18篇、散文有17篇、新詩有44首，攏總有79件，是這幾冬來件數上濟的一擺。
委員一致通過，公推向陽老師擔任主席，負責主持這擺的會議。佇伊豐富的經驗佮熟手的能力之下，會議進行誠順利。起頭，委員有幾个共識就是：第一，所謂的「台語文學」就是作品本身同時愛有「台語」佮「文學」的內涵佇內底，欠一項就無合「台語文學獎」的理念佮資格。第二，除了語言的準確佮文學的深度，希望參加文學獎的作品內容愛有較濟多元性、特殊性、突破性的題材，按呢才會當顯示台語文學的闊度佮深度。
這擺18篇的小說，題材包含政治、親情、人物、宗教、烏道、軍隊……等等的故事。著獎的作品是〈Kéⁿ-kui〉，本身就是一篇政治性的小說，作者用略仔詼諧的台語、輕鬆的手法，一方面去描寫白色恐怖時代，彼个充滿威權統治的政權，所做濟濟違法失德的代誌；一方面嘛用來顯示一寡有良知的人，思想的覺醒、勇氣的puh-ínn。這款過去非常禁忌的題材，以後應該會愈來愈濟人書寫。
17篇的散文，主要內容有親情、愛情、人物、家族、宗教……各方面的心情。著獎作品〈啞口新娘家己嫁〉，書寫一个受過傳統父權觀念傷害過的女性，伊毋願委屈吞忍，就親像「蟮蟲仔斷去ê彼截尾溜仔」，活出家己的新性命；閣藉著母語的炤光，行出家己的新出路。
44首的新詩，分別書寫親情、政治、人物、戰爭、語言……無仝款的感想。著獎作品〈「有伊的」歌──紀念瑪麗斯．孔黛（Maryse Condé），兼寫予臺灣〉，作者透過非洲裔法語作家瑪麗斯．孔黛，一生注重種族、性別佮文化等議題的作品，來對應臺灣本身的命運，咱對伊一句一句優美感人的詩句，會當感受著二个遙遠的所在，仝款的溫度。
對這擺的作品的內容，咱感覺會出參賽者有一寡是少年輩抑是初寫台文的作家，這對台語文學基本上是一个真好的現象，毋但參與的人數增加，𪜶書寫的素質、題材、技巧……攏有袂少誠好的作品。毋過，較可惜的是𪜶佇「台語」這个部分，無論是語詞抑是語法，包含用字、用詞、甚至規句的結構，攏猶有透濫華語的情形，無定猶會予人懷疑，這是毋是對華文作品硬加翻譯過來的。當然，恁長期慣勢使用華語書寫，一時欲改用較無熟似的台語創作，難免就有這个問題出現，尤其是比賽的時陣就會較吃虧。希望恁毋通失望、放棄；顛倒愛繼續書寫、繼續訓練，寫久、寫濟，自然就會愈熟手愈進步矣。上好是養成習慣，平常時就用台語的語詞、語法思考，按呢，寫落來的作品，自然就有台語的氣味矣。
另外，雖然講佇79篇的作品內底，包含濟濟無仝的題材、創意、技巧、精神等等多元的內容。毋過，就整體來看，描寫親情抑是人物的方面，比較起來猶是加誠濟。照理講這嘛是一个真正常的現象。對一个創作者來講，家己的親人（阿公、阿嬤、爸母、兄弟……）抑是予伊疼愛、數念的特殊人物，總是伊上親近、上尊敬的人，你對𪜶有具體的了解、真心的感情，這是寫作者上自然會去書寫的對象。不而過，共類似性質的作品囥做一夥，會予人感覺「同質性」傷懸，「開闊度」無夠，對一个文學獎，尤其是全國性的文學獎來講，毋是足好的現象；這對一个創作者、參賽者來講，嘛是愛認真思考的問題。
落尾，愛特別說明的，這三篇作品雖然攏是彼个項目的頭一名。毋過，無一篇是提著滿分的，也就是無一篇攏一致得著全部評審的上懸分。這一方面當然是評審先生有伊個人無仝的審美觀念；另外一方面嘛證明這擺比賽的競爭是足激烈的，得獎者佮落選者之間的差別是足接近的。咱一方面恭喜著獎的人，愛閣認真努力；一方面嘛鼓勵落選的人，閣愛繼續拍拚。
