2025臺灣文學獎【台語文學創作獎新詩首獎〡評審短評】莊佳穎

字級： 小 中 大

詩是文學的貴族，是詩人嘔心血共理性的結構、感性的筆調、到分的文字攏束焦以後，所鋪排出來的作品。

 

這擺投稿的新詩作品，無論是語言句法佮表達技巧，抑是題材創意佮藝術審美，攏有真值得呵咾的表現。雖然有一寡作品小可有華語的用字佮句法表現，毋過只要台文詩的創作會當延續，台文的寫作一定會愈來愈自在。這改予評審特別感動的是，對題材、內容、語詞佮筆路來看，通看出台文詩的作者年齡範圍真闊。而且，少年的、素人的詩人，和資深的、熟手的詩人，已經是相拍袂過田岸，咧欲無輸贏。

 

新詩的得獎作品〈「有伊的」歌——紀念瑪麗斯．孔黛（Maryse Condé），兼寫予臺灣〉透過寫人物來寫臺灣，將詩的主題佮臺灣歷史做真幼路的結合。詩的每一段攏有詩人的社會關懷，嘛有伊佇時間和空間、主體和他者、軟勢的詩句和硬篤的思考之間，自由飛翔的文字表演。