2025臺灣文學獎【台語文學創作獎散文首獎〡評審短評】陳豐惠

字級： 小 中 大

這是一篇──久年面對本底埋真深真深心理ê thàng疼甘願做啞口，m̄-koh路尾決定勇敢越頭tsîn，毋願繼續失聲，正面、注神看hia-ê必裂猶未堅ta ê空喙，而且選擇用家己熟似--ê、喙舌kah心相迵ê語言書寫一句koh一句ê綿綿心意，重新看待家己，接受「雖罔無夠完美m̄-koh愈來愈完整ê自我」——ê作品。

 

Tuì覺悟以早愛人「ná蟮蟲仔斷尾求生」到回想細漢時ê家庭暴力造成ê驚受放sak ê陰影kah創傷，作者真幼膩書寫苦thàng ê「劇情」點滴，毋知經過偌久ê情緒滾絞——自卑、怨嘆、後悔、餒志、吐大氣kah暗暗目屎流bē離，到尾tsiah雄雄了解：其實ē-sái免koh「漚戲拖棚」，免koh直直hōo別人侵門踏戶，無需要koh閃避猶原會疼ê空喙，應該聽家己心肝底真實ê聲音；mài做顧監--ê，mā免做親情ê監囚，ài先kā家己顧hōo好，tsiah thang學會曉接受家己kah對別人付出。

 

面對thàng疼，毋願失聲。嫁粧是詩，無koh稀微，去傷解鬱免別人醫，自尊自信家己起。