2025臺灣文學獎【台語文學創作獎小說首獎〡評審短評】鄭順聰
Kéⁿ-kui，漢字是「哽胿」，意思是物件哽佇嚨喉強欲斷氣，是這篇小說的起頭，比喻臺灣的處境，嘛共主題掜予牢牢。
這篇政治寓言小說，用多變的文體和扭掠手路，寫往過島嶼政治揤壓的歷史：陳文成事件、美麗島事件、臺大哲學系事件、江南案、林宅血案、馬場町刑場、野百合學運，閣有《美哉中華》等。
就語言來講，濟濟的文句有影是媠氣：「你毋thang看伊按呢kiâⁿ路sô-sô， 目睭lô-lô，伊chia̍h kah油sé-sé、肥chut-chut，猶想beh做皇帝喔。」共台語的特色運用甲真活氣，人物的形象是真拄真。
閣有像「伊甘願踮孤島顧燈塔，抑是佇沙漠teh修苦行，像七等生小說ê人物，性格孤ta̍k，無ài佮人交陪，甚至是淡薄仔kok-pih，顛倒較自由。」用詞束結、準確，共人性一下仔揬開，成做寓言的一部份。
「英雄ê血是面對真相ê勇氣，嘛是一款罪ê洗淨。」這篇小說精彩的語言表現，代表台語文的底蒂都拍在在矣。歷史之終結和新時代，咱好來放手，寫閣較濟無仝款的題材和風格，向望台語小說的新椏和大葩尾。
