2025臺灣文學獎【客語文學創作獎散文首獎〡評審短評】邱湘雲
這擺投稿个客語散文，從題目來看，有寫爺哀、姐婆、姐妹、老弟等「親情」主題，有寫故鄉、尋根、花布等「懷舊文化」主題，也有寫現代鄰舍相處、老人長照摎面對生死个課題。從語言運用來看，大部分都做得將客語詞彙順序運用在文章當中，毋過有兜嗄分人感覺著「為用而用」，雖然有心表現當會講客語个本等，「語言性」顧著，「文學性」嗄不足。其實「客語文學」不只係會用客語就好，「文學表現」正係「客語文學書寫」摎「客語口頭表達」最無共樣个地方。
這擺客語散文得獎作品〈籠仔肚个光〉，內容係寫倈仔照顧發癱風阿爸个心路歷程。寫田坵「係耕田人个教科書，行行都係字句」；寫阿爸看病拿藥單，像「貼在老屋門楣項，一張張褪色，無效个平安符」等等，比喻都盡巧妙。還運用「意識流」个文學手法，一下描述阿爸个病況，一下回想起細細時節阿爸對屋家、子女个關愛。現實摎回憶交織，有外在摹寫也有內心獨白，文學手法表現到當熟絡。
這篇文章客語用著異流掠，比喻盡豐富，對病患摎照顧者个心情，都寫來當幼路。題目用「籠仔肚个光」象徵「等待解脫」，反映出現下臺灣老人長期照顧个社會議題，所以經過評審詳細討論，一致認同〈籠仔肚个光〉這篇係今年客語散文得獎个代表作品。
