2024臺灣文學獎【客語文學創作獎〡評審觀察】邱一帆
2024年臺灣文學獎客語文學創作獎，徵選个文類包括客語新詩、散文同小說三類。根據比賽个規定，各類作品做得各取1名，得著臺灣文 學獎首獎个肯定摎鼓勵，毋過，係講該類作品無達到水準，該名額做得留分其他文類，乜做得從缺處理。
這擺客語文學創作獎總共有34件作品參賽，包括小說6篇、散文11篇、新詩17篇，新詩最多、散文第二、小說盡少，這種數量同比例，異符合目前臺灣客語文學創作、投稿个現象，這種現象，多多少少反映出各文類書寫个簡單同困難，還有創作者在客語文字書寫个運用摎熟絡个程度。
主辦單位臺灣文學館，當謹慎个邀請複決審委員，除忒確認評審委員無報名參加年度徵獎以外，還強調在主辦單位公布得獎名單之前，所有个評審內容同得獎作品愛對外保守祕密。6月24號下晝兩半點過， 主辦單位召開評審會議，互相正知這擺个評審委員係──利玉芳、鍾永豐、羅思容、張芳慈同邱一帆。
在複決審會議之前，臺文館副館長蕭淑貞先致詞歡迎評審委員，同時盼望公正評出好个結果。接等，主辦單位就複決審會議个程序做說明，請評審委員互相推選，這擺複決審會議个主席。在利玉芳、羅思 容、張芳慈委員个推舉之下，大家無異議，請鍾永豐委員擔任主席，主持評審會議个進行。
複決審會議開始，評審委員照會議程序，就小說、散文、新詩个文 類順序來進行審查討論同表決。以下就評審个過程同得獎作品，做簡要个描寫同說明：
短篇小說作品，總共有6篇，經過委員个初審，各個委員擇出2篇 作品，做第一輪个投票，總共有5篇作品得著票數。接等，主席請各各 委員針對自家推薦个作品，就小說个主題、情節、人物心理、語言風 格、當代性等面向來做講評、說明。過忒，委員就入圍个作品，再進行第二輪个投票。開票結果，短篇小說作品〈孝子〉得著最多个分數，所 有委員無異議通過作品〈孝子〉得著今年客語文學創作獎，短篇小說類 个首獎。委員認為這篇小說〈孝子〉用幼秀个客語，第一人稱描寫，身為半老人家个現代孝子，照顧老人家──哀仔个情況，不管係飼飯、食藥仔，抑係換衫換尿布仔……，項項就係事頭，事事就有困難。
小說藉等在夢中同哀仔翕死个情節安排，虛實之間，深刻反映出照顧者奈何又無奈何个心理樣態，還有現代老人照顧重要个問題。小說孝子衰過个身 影、困難个遭遇，生動顯影，當做得引起讀者个同情，同時，乜做得喚起讀者對這議題个關心。
散文徵選作品，總共有11篇，經過委員个初審，各個委員擇出2篇 作品，做第一輪个投票，總共有5篇作品得著票數。續等，主席就請委 員針對自家推薦个作品，就散文个主題內容、結構、語言、現代性等表 現來做敘述、說明。過後，大家就入圍个作品，再進行第二輪个投票。 開票結果，散文作品〈遽遽〉得著最多个分數，所有委員無異議通過作 品〈遽遽〉，得著今年客語文學創作獎散文類个首獎。委員認為這篇散 文〈遽遽〉，用第一人稱个角度，對該年阿爸破病，著著肺癌末期寫 起，知著阿爸嚴重个病情，面對阿爸， 在愛講抑係無愛講、在仰般講同 講出嘴之間，心肝頭龍龍鍾鍾，毋知仰般形正好，作者都有當多精彩个 描寫同比論，深深刻劃子爺个感情。在阿爸生死交關个時節， 心肝肚 就算仰般想，阿姆做得在阿爸个身邊，毋過， 還係無法度轉到美好个頭擺。作品〈遽遽〉無論在主題个呈現，個人心理个外在描寫，都有當好个表現。
新詩類个徵選作品，總共有17篇，經過委員个初審，各個委員擇出 2篇作品，做第一輪个投票，總共乜有5篇作品得著票數。接等，主席就 請各各委員針對自家推薦个作品，就詩个主題、結構、意象、語言等表 現來做解讀、說明。過後，大家就入圍个作品，再進行第二輪个投票。 開票結果，新詩作品〈灰鶴倒影〉得著最高个分數，所有委員無異議通 過作品〈灰鶴倒影〉，得著今年客語文學創作獎新詩類个首獎。這首新 詩〈灰鶴倒影〉分做四段，第一段，描寫一隻對北方來个灰鶴仔落腳在 樹下田項，同企歸下晝个老耕種共樣，像一面老和尚入定个風景。第二 段，描繪灰鶴仔身邊个水仙花、大鯉嫲等，帶出自家前生个疑問，木橋 頂上下相印、水面頂同水面下个身影，像到無跌忒个雙生形影，反問到 底哪正係自家本來个面目。第三段，質問自家，現實同真實、遠方同鄉 愁个距離，還有名安到家鄉个所在，就在清醒个水面、心頭、塵光頂。 第四段，風景个變化，時光个消逝，在春分前後，灰鶴倒影還係跍身在 這，等等時節，飛轉去，飛歸來。評審認為新詩作品〈灰鶴倒影〉，有 異深个詩思、禪味，藉等描寫灰鶴仔來臺過冬个身影，思愐前生、本來 面目、鄉愁家鄉、時節來去這兜人生重要个課題。
評審建議，客語文學創作獎參賽个作品，愛表現熟絡个客語文字使 用能力，分評審一看就知這係用客語思考、寫作个作品，毋係用華語翻 譯个作品，故所作者應該同客語學習到當好、同客語漢字運用到當好， 在文學裡肚表現出來。每一種文類、作品都愛呈現厥个文學性，像新詩 愛表現厥个意象性、結構同層次，還有語言个音樂性，毋好講到忒白像 說明文，愛留分讀者有當多个聯想同感動；散文，強調敘事个結構性、 敘述个條理，分讀者感受著作品个真摯同豐富个感情；小說重在情節个安排，來彰顯主題同人物个性格，有較多虛構个部分，分讀者試著精彩，看到入文。每一儕人、逐個族群都愛面對自家生活个環境，經驗自家行過个時 代，就會有自家愛面對个問題，尋出這兜問題或者事件，就做得尋出自 家做得寫作个主題。這兜主題个寫作，作品就有所謂个現代性、族群性 還有時代性，這兜題材，就在寫作者自家个生活裡肚，等等大自家來發 覺。係講，做得寫出這兜主題，客語文學作品就做得反映出現代性、族 群性還有時代性，同時乜做得將客語文字个書寫帶入現代，行向未來。 期望在客語文學創作个路項，大家一路堅持，一路做伴，留下屬於 個人、族群、時代个作品。
