2023臺灣文學獎【台語文學創作獎-小說〡評審短評】胡長松
作者/胡長松
臺灣文學獎這屆小說獎的作品〈相伨〉，寫的是嘉義庄跤的善良人家之間的友情。男主角阿成的老母是雲林人，嫁去嘉義做豆腐的人家。阿成的阿媽過身了後，豆腐的生理是阿成的老母發落，阿成的老爸起豬牢飼豬。後來阿成的老爸共農會借錢擴大豬牢的規模，不幸著豬災失敗，豬仔囝攏無去，阿成的老爸嘛過身，豬牢拋荒去。
阿成本底讀獸醫，比賽著等，保送科技大學，因為厝nih變故，老爸借的錢 致使厝nih經濟出狀況，傷心無閣讀冊，一个人去到臺北走車。女主角阿珠的老 母佮阿成的老母是仝鄉，生阿珠彼日就拚血過身去，阿成的老母一直誠照顧阿 珠，甚至出錢贊助阿珠考高中閣納註冊費，後來阿珠考著臺大法律系，去臺北 讀冊，後來做法官，伊佇臺北揣著當咧走車的阿成，共伊鼓勵，閣講起阿成的 老母跋倒的代誌，予阿成決心轉去故鄉嘉義發展。
阿成搪著進前欣賞伊的教授，重頭學飼豬，三冬後學成，想欲佇老爸拋荒的豬牢東山再起，欲飼豬仔栽，毋過欠資金借無錢，四界碰壁。阿珠的老爸知影，共阿珠講，阿珠隨提錢相添，予阿成的事業順利起磅，生理愈做愈大，後來成做「嘉義豬仔成」……。
這篇小說用樸實的手路，寫出臺灣鄉土純真的人情，對庄跤的經濟現實有相當寫實的掌握佮描寫，嘛對人的心理互動有頂真的觀察。作品人物雖然是小人物，毋過善良人互相相伨的真情飽滇，予人誠感動，尤其故事情節有誠好的 奮鬥性，真值得咱這个時代的台語小說寫作者參考。
