Tī 心悶ê 所在,thn̂ g 根湠葉
自2020年起,臺灣文學館kā創作獎ê評審辦法做大調整,本土語言調整做逐種語言ê新詩、散文、小說三種文類攏設獎項,2020年三類收著50篇左右,2021年三類收著62篇,今年新詩收著42篇,散文收著13篇,小說收著6篇,雖bóng總數量無超過舊年,m̄-koh評審認為這擺ê詩kap散文大部份ê水準tsiok kuân,逐款獨獨欲揀一篇發獎金實在頭疼。
上濟有志投稿ê新詩主題,有幾若篇寫眾人注目ê時事—國際戰爭,mā有寫較無人關注ê外國人權事件--ê,寫人物--ê除了文學獎sù常有--ê——寫歷史人物掠外,iáu有寫親人、厝邊、販仔、原住民iah新移民;另外,描寫自然生態來表達人生觀--ê mā有--幾--篇。其中〈所在——寫予「玫瑰古蹟」佮蔡瑞月老師〉經過幾輪ê投票了後得著逐家ê肯定,讀這篇m̄-nā欣賞著suí-khuì ê臺語詩句,mā kánn-ná看一齣hōo人感動ê歷史短劇。逐款文學獎一向攏是新詩上濟有志投稿,檢采是值得歡喜ê代誌,m̄- ko h想欲提醒——這擺部份作品ê欠點——「新詩」應該毋是「散文」拆tsuā排列ê產物,欲按怎hōo語句較束結,按怎精煉語詞hōo有「詩味」,需要逐家繼續來思考參探討。
散文13篇,無算kài濟,m̄-koh多數攏仁仁仁,評審公認這擺有濟濟篇袂輸小說ê架勢,水準thang講是三組上kuân--ê。主題方面,雖bóng上濟人寫「序大」,m̄-koh有ê借植物來描寫,有ê透過舊厝iah是íng-kuè代誌來鋪排,甚至有表現地方腔口--ê,thang講真幼膩寫出各地頭臺灣人ê生活面貌,是通俗ê主題,煞完全袂hōo人看甲tuh-ku。寫美麗光景--ê mā真siânn人目,iáu有hitlō寫菜市仔ê僻話--ê、寫家己澈底改變人生--ê,thang講hōo評審sian讀to讀袂siān。
料想會到,uan-na有寡有講著COVID-19疫情--ê。Tī讀甲tsiok爽快了後,欲決定hōo佗一篇散文著等,就hōo評審頭殼mooh leh燒--ah。經過討論kap幾輪投票,決定頒獎h ō o〈院之囚,籠中鳥——觀察室五日〉。這篇是作者tī COVID-19疫情期間蹛病院觀察室五日ê記錄,除了家己ê症頭,mā kā病院內無仝族群ê患者、陪伴者、醫生和看護ê互動寫甲真自然koh活跳,呈現多元ê性命故事,mā有點出病院制度ê問題和醫護人員ê辛苦,ē-sái講是結構完整,內容飽tīnn ê傑作。平均水準是算上kuân,m̄-koh iáu是會發現有一項華語語法沓沓影響著有志,he就是tī動詞後壁接「著」來表示「現在進行式」,這毋是臺語在來ê表達,煞不時tī臺語歌iah文學作品看--著,實在hōo人煩惱。近來一本新冊《語言學家解破臺語》,作者專研臺語語法,逐家ē-tàng參考。
「小說」類,主題有寫臺灣威權時代歷史--ê,有牽涉「反服貿」議題--ê,mā有寫移民外國ê心情--ê,算相當多元,可惜有袂少問題;胡長松評審ê短評寫甲真明--ah,我就免koh加話。寫小說thang講是苦工中ê苦工,是大工程,需要真濟條件來促成。Beh望臺語小說早日開枝散葉,m̄-nā需要做序大--ê鼓勵序細好膽行文學ê路,tī家庭內鼓勵講臺語和讀臺語小說,mā需要國民基本教育加強臺語文素養,尤其是臺灣文學kap臺語文相關系所ài加開「臺語小說欣賞kap創作」相關課程,逐方面來sio-thīn tsiah會成。