2021臺灣文學獎【客語文學創作獎｜評審觀察】
2021年臺灣文學獎─客語文學創作獎，徵選个文類包括客語新詩、散文同
小說三類。根據比賽个規定，各類作品做得各取1名，得著臺灣文學獎个肯定摎
鼓勵，毋過，係講該類作品無達到水準，該名額做得留分其他文類，乜做得從
缺處理，這辦法，在主辦單位召開複決審會議个時節，親身主持會議个館長，
過一擺強調。
這擺客語文學獎總共徵得37件作品，包括小說3篇、散文7篇、新詩27篇，
新詩最多、散文第二、小說盡少，這種數量、比例，亦符合目前臺灣客語文學
創作、投稿个現象，這種現象，多多少少反映出各文類書寫个難易，還有創作
者在客語文字書寫熟絡、運用个程度。
在截稿日過後，有了投稿个客語文學徵選作品，主辦單位臺灣文學館，當
謹慎个邀請複決審委員，除了確認評審委員無報名參與年度徵獎以外，還強調
在主辦單位公布得獎名單以前，所有个評審內容愛對外保守秘密。7月5號下晝
兩點半，主辦單位召開評審會議，互相正知這擺个評審係─何石松、張典婉、
劉慧真、羅秀玲還有邱一帆。
在複決審線上會議之前，主辦單位就各文類作品，先請評審委員舉行線上
投票，投票結果係為著利便複決審會議个進行、討論。會議一開始，主持人蘇
館長希望評審委員本於專業，選出文學性高个客語文學作品，將來愛推動作品
个外譯計畫，推介、行銷優秀个臺灣文學、客語文學。接等，主持人請評審委
員互相推選這擺複決審會議个主席，因爭張典婉委員、劉慧真委員、何石松委
員都有做過評審會議个主席，在佢兜个推舉之下，大家無異議，𠊎黏時接下會
議个主席，主持會議个進行。複決審會議開始，評審委員有共識照小說、散
文、新詩个文類順序，討論、表決、選出入圍、得獎个作品。以下就入圍、得
獎个過程同作品做簡要个說明同描寫：
投稿个小說作品本旦係3篇，毋過，其中一篇〈拆屋〉，經過主辦單位个審
查，既經在國藝會補助出版過，就無列入評審會議个討論。另外一篇〈折斷个
義民劍〉大部分係華語寫作、中文思考，無經過消化个歷史小說，無得著任何
評審个支持。〈雞嫲啼〉這篇主題係描寫日本以來，經過日本皇民化、國民政
府，原漢兩個家庭因為原漢界線、通婚、細人仔安名、滿月、財產權等衝突摎
適應个過程，包括當事人同當事人(族群之間)、當事人同政府(殖民同被殖民之
間)。小說一開始用老時鐘、廳下个幾幅舊畫像，呈現時代同人物，手項分時間
染黃个信紙，係老妹谷拉斯留分阿姊依布个回憶，當有文學性个寫法。依布同
谷拉斯係原住民、母系族群兩姊妹：依布嫁分漢人客籍家庭，經歷結婚、降
子、安名等等，同家官个衝突；谷拉斯繼承阿姆个家業，結婚降子，共樣堵著
日本皇民化後，無法度為子女安自家族群名仔个問題……，還有接下來國民政
府時節，屋地財產改登記分細倈人个衝突。本篇小說个文學性異足、文句个描
寫乜異流順，評審一致同意〈雞嫲啼〉入圍客語文學小說。毋過，除忒部分用
字毋著以外，〈雞嫲啼〉這篇小說就人物使用个語言來看，該時代還會出草个
原住民、歸个家庭，仰會使用恁流掠个客話？作者並無在小說裡肚提供相當个
線索或者背景，這同歷史普遍个事實可能有相當个差異，驚怕顯示出小說文本
个族群偏見。另外，文本將兩姊妹設定係出自「阿姆做主」个母系社會，家族
細妹人有實質个財產、安名等權利。就臺灣原住民族社會，家族係最堅強个共
有財產摎共同生活基本單位，故所財產繼承權摎家長權係並行个。臺灣原住民
个親族組織分做氏族社會同世系群社會兩種。母系氏族社會有南部阿美、卑南
社卑南族。世系群社會母系世系社會包括北部阿美、知本群卑南族。(參見臺灣
原住民族資訊網http://www.tipp.org.tw/aborigines_info.asp?A_ID=1&AC_
No=3)，這兜母系族群社會同臺灣客家族群主要分佈有相當个距離，選這原漢兩
個族群來講通婚个故事，欠缺歷史个真實，就較難得著，小說比歷史更加真
實、感動个作用。最後，評審一致決議客語創作獎小說類從缺。
散文徵選作品，總共有7篇，經過評審个投票，選出3篇入圍作品：〈疫情
時節 講「發」字〉、〈轉屋个路〉摎〈阿富牯〉。〈疫情時節 講「發」字〉，
對客語个詞彙「發」字聯想，結合目前流行个疫情描寫「發瘟」、講著家族、
隔壁鄰舍著著有關發个病症像「發痧」、「發蛇」、「發豬頭皮」這兜情況，
還寫出各種症頭个民俗療法等等，一條一條當生活、生趣个古，展現在讀者个
目前。各種故事个轉折个描寫、接合个過程流順，又現代又傳統。〈轉屋个
路〉係描寫作者自家行轉講客話、寫客文个心路歷程，解開FB同學看毋識、寫
毋出客語文个問題。自九年一貫課程開始教客話、指導學生仔、妹仔演講、講
古比賽、同屋下人共下參加客語認證、翻譯童話故事、創作山歌詞、參加客語
文學獎比賽得獎等等，到今一直行在拈轉客語文个路項。〈阿富牯〉係描寫一
个中壯年阿富牯歸鄉打拚、種出無毒有機个紅龍果、耕種有成个故事。本旦莊
下个田地，阿爸拿來作魚塘、蓄魚仔，投資當大个成本，好死毋死堵著八八水
災，同阿爸个心血、本錢打凈凈，還使致阿爸精神打擊、中風、過身。阿富牯
決心歸老屋，做小工加添收入，一擺參加藝術綠市集个活動，看著無毒有機个
農特產品行銷，佢想著自家个家園田地乜做得種紅龍果。佢一方面請教專家紅
龍果產銷班个班長，同時在自家个沙田試種，兩三年過，種出優質个紅龍果，
打響名號。這三篇入圍个作品，評審認為〈轉屋个路〉描寫較一般，文學性較
毋罅，〈阿富牯〉這篇開頭，切入主題人物个描寫，有較慢趖、部分用詞華語
化。最後，評審一致同意〈疫情時節 講「發」字〉得著客語文學創作獎散文類
个獎項。
新詩類个徵選作品，總下有27篇，投稿篇數最多。經過評審个投票，選出5
篇入圍作品：〈盡尾枋个老車票──東勢支線停駛紀念〉、〈阿婆，你好無?〉
、〈細浮鴨个漂浪事件〉、〈蹶上城門个叭哈花〉摎〈月曜日个月臺崠遐
岸—0.000000001s〉。〈盡尾枋个老車票──東勢支線停駛紀念〉歲月个衫袋
裡肚跌出來个老車票，鑿過个空，係遊子回望故鄉个眼，回憶在東勢站坐上盡
尾枋火車个情景、下車停駛个感傷，停在票亭，剪下个圓圓个票屑，係等等遊
子尋轉該年跌在故鄉个心。〈阿婆，你好無?〉該日落雨天阿婆還山，愐起童年
時節同阿婆共下个日仔，有惜也有恨，想起阿婆愛走个時節大家个毋盼得，一
聲阿婆，你好無？係孫女自家心肝肚對阿婆个愛恨化解。〈細浮鴨个漂浪事
件〉用擬人法細浮鴨个角度，描寫來桃園新竹陂塘過冬个情景，最尾段點出陂
塘少忒、紅毛泥化，無適合再來過冬个感嘆。〈蹶上城門个叭哈花〉叭哈花係
臺灣百合，比喻臺灣後生，生長在承恩門脣，了解著二二八事件同續後个清
鄉，這兜粗殘个歷史，也理解這兜不公不義，帶來記憶个疤痕，盼望後生面對
過去、踏正腳步、迎向落雨過後个天弓。〈月曜日个月臺崠遐
岸—0.000000001s〉這篇形式創新，在0.000000001s恁短个時間裡肚，男女透
過對話，寫出當時看著个情景、心情个感受、情意个表達，表現男女互相之間
醹醹个情意、真心个盼望。這五篇入圍个作品，評審認為〈盡尾枋个老車票
──東勢支線停駛紀念〉算係懷鄉个作品，無講當新色，〈阿婆，你好無?〉、
〈細浮鴨个漂浪事件〉有兜用詞無精確、華語化。包尾，評審一致同意〈蹶上
城門个叭哈花〉摎〈月曜日个月臺崠遐岸—0.000000001s〉得著客語文學創作
獎新詩類个獎項。
