絃仔跤挨久mā 會上大舞台
臺灣文學獎tuì2008年開始設本土語文ê獎項,tshím-thâu是臺語、客語、
原住民(以漢語為主)3个語文/族群輪流,1冬輪1个。毋過,3冬輪1遍,彼1
遍koh tio̍h詩、散文、小說輪流徵選,若欲看著臺語ê仝1个文類獎項,愛koh經
過足濟冬。2017年開始,本土語文ê獎項無閣輪番,毋過文類iáu是維持1冬1
項。2020年,臺文館koh kā評審辦法做khah大ê調整,舊年開始ê臺語文學創作
獎就是新詩、散文、小說3種文類攏設獎項,隨項取頭位kah入圍。
徵獎規則改新,雖然獎金khah少,總--是,逐冬有無仝文類ê臺語文學作品
通寫、通讀、通得著全國性ê表彰,相信對本土語文ê文學創作有koh khah大ê鼓
勵意義。今年ê「臺語文學創作獎」攏總收著62篇投稿,其中小說7篇,散文16
篇、新詩39篇。Hām舊年ê總投稿量比起來,確實有看著提升。
今年是5位評審(向陽、路寒袖、陳豐惠、林裕凱、筆者)做伙評3項文
類,複審了後,決審會議有蘇碩斌館長主持kah見證,咱kā各文類攏揀出頭位1
名,koh另外取2名入圍小說、5名入圍散文、4名入圍新詩ê獎項。評審攏有共
識,kah是臺語文學ê創作獎,上無語言kah語法ê運用tio̍h端然、正範,ia̍h上要
緊ê評判基本iáu是文學性。入圍ê作品中間,uân-ná有寡華語化ê表現,徛tī鼓
勵ê立場,khah細項ê欠點咱就無khiau-khi。
Koh一項,tuì題材kah內容來看,通看出作者ê年齡範圍真闊,所以作品ê設
想真多樣。臺語khah好ê、故事khah有時代性ê,kiám-tshái khah有歲ah;ia̍h
少年人mā袂少,語詞khah現代、khah口語,筆路tsiânn青春。這應當mā反應
母語教育kah意識ta̍ uh-ta̍ uh tī無仝年歲層ê中間湠根,確實是好現象。
各文類ê評論有其他幾位評審分別紹介,咱tī遮kā頭位kah入圍作品ê優點做
簡單ê總評。
小說ê頭位〈斑甲市〉(斑鴿市),用石碑所記載ê斑鴿神蹟,開展一个奇
幻故事,講tuì三百冬前就hōo民間服侍到今ê神鳥,按怎hōo一个失蹤真久ê人
所利用來做轉去故鄉轉食、到尾koh做到市長ê過程kah伊害人無數ê真相。小說
ê空間書寫配合時間ê轉換,人物tī真實kah幻影中間來回徙動,故事飽滿精采。
現代感kah歷史感攏滇滇,是一篇結合古式ê神怪小說kah西式ê魔幻寫實ê技
巧,來供體現當代以怪力亂神ê步數leh欺騙大眾ê政治人物ê好作品。入圍ê〈姊
妹仔.再會〉寫都市ê同志故事,無koh表現悲情,mā反應現此時少年ê感情
觀,上尾ê結局會hōo讀者意外ê吻笑。另外,〈司馬遷金金相〉用掀卷宗ê體式
寫出7段看起來獨立,毋過中間有相連紲ê歷史,對話ê論辯內面,看會著作者想
欲替小眾ê歷史觀反變(píng-pìnn)ê企圖。就題裁kah筆法來看,這3篇小說
攏有表現創意kah新意。
散文ê頭位〈Sîn話鬚仔〉,是一篇用感性ê筆調所鋪排出來ê理性tik ê作
品。Tuì世界ê文字發展,寫到自我成長史中ê語言hām歷史感受kah重新ê介
入,替所經驗過ê「話鬚」留落哲學tik kah美感tik ê記持。入圍ê〈轉〉用兩張
椅頭仔牽咱轉去作者放蕩ê細漢時、了後轉變ê性命,koh有永遠會tī彼兩張椅頭
仔thìng候囝兒轉來ê老母,是真有溫度ê親情kah自省ê寫作。〈「支援--
ê」──寫予台語伴〉用批信ê形式kah素樸ê文字,寫出母語支援教師ê拍拚kah
無奈,讀tio̍ h會目箍紅。〈銀角仔〉記錄作者用銀角疊起來ê少年時代,kah疼
惜艱苦日子ê青春歲月,展現出真奮志ê人生觀。〈彼盒食毋知味的豆花〉寫厝
裡姑不而將tsiah經營「大家樂」ê往事、本底綿綿koh甜蜜ê豆花因為老爸hōo
警察掠去suah雄雄變味ê經過;hōo人感動作者ê老實kah樸直。〈外省仔喙〉
是查某囝用「鹹菜滾白肉」寫嫁來福佬家庭、臺語練kah真輾轉ê外省老母,半
世人經歷族群中間ê ke̍ h-kô,koh來欲迎接越南新婦ê歡喜kah疼惜,hōo咱mā啖
著文化融和ê滋味。
39篇ê新詩中間,袂少是寫hōo人物、事件ê作品,無論是得著頭位ia̍h是其
他ê入圍作品,大概攏tī這个面向,這mā是臺語文學創作者ê歷史ia̍h社會關懷ê
表現。頭位ê〈「你對佗位來?」〉是寫hōo白色恐怖受難者藍明谷、張阿冬翁某
ê詩,寫in拍毋見ê身世、失落ê心境、tshē底ê情感、無聲ê向望;讀起來hōo人
心酸、毋甘。
另外,入圍ê〈我毋是家己的我〉,寫hőng關tī新疆集中營ê Gulbahar ê受
難經歷、重生ê靈魂kah思想,koh伊向世界控訴中共惡行ê行動哲學。〈啼印〉
內ê雞啼是鄉村ê象徵,suah成做著kah侵門踏戶ê都市人拍官司ê因端,日常ê啼
聲hōo人拍破,轉換做呼請正義ê聲嗽。〈蘆竹的咒讖〉用淺白素樸ê語詞,替
受著帝國侵犯suah長期失去聲說ê受傷女性—所謂ê慰安婦,講出in ê傷痕kah儼
硬,柔軟koh有層次ê書寫,是上有力ê控訴。〈歹物仔〉寫出自惡魔ê病
毒,mā寫失控ê人心,tī毀滅ê中間,用正面kah形而上ê思想來定位這場災厄、
安慰受難ê亡魂。
以上簡述這遍著等kah入圍ê作品。咱是評審當中siōng資淺ê,hōo主席向
陽老師指名寫這篇總評,實在佔權。就借這个機會kā所有ê投稿者kah想欲投入
台文創作ê朋友鼓勵:一牽成、二好運、三才情。敢有著獎,毋免hiah要
意。Kah有心欲用母語寫作,就kā家己當做南北管ê絃仔跤,咱勻聊仔挨,勻聊
仔磨,等母語文學ê果子koh khah到分,逐家做伙坐tī國家演藝廳挨一齣上好聽
ê交響樂,hōo人贊聲袂煞。