創作類臺語新詩金典獎
評審感言
◎評審╱胡長松
這屆臺灣文學獎的臺語詩創作金典獎,參賽的作品30件,經過三位評審討論,順利選出2篇金典獎作品佮另外3篇入圍作品。
第一篇金典獎作品〈布袋〉是非常特出的長篇抒情敘事詩,用兒女的視角書寫老爸。這首詩篇幅超過500逝,規模真大,自然的語詞運用,深情中有節制,擴展出用日常臺語傳達感情的各種詩意的可能,嘛予咱了解這位「阿爸」有代表性的一生。詩的時空對主角阿媽受1915年噍吧哖事件連累、入佇「布袋」予羅漢跤撿的家族命運起蒂,一直到主角骨頭烌裝佇「布袋」佮世間告別,佇樸實閣有韻律的節奏中,作者用一逝一逝詩的布袋線牽主角一世人的布袋命,歷史的跨度超過100年。這首詩寫散赤囡仔細漢穿阿啄仔麵粉「布袋」所做的衫去看「布袋」戲,寫大漢利用歇晝自學讀伊貯佇「布袋」的冊,後來嘛因為讀冊,被關入親像「布袋」的監獄,經歷過228、白色恐怖佮美麗島事件,寫伊拖磨的命運佇歷史考驗中的奮鬥佮堅強,閣寫伊最後破病的時,親像「布袋」的肺部共一生的苦難窒滇。共主角一世人的年日,用「布袋」做多層次的形象建構,最後形成精密的隱喻系統,嘛予這首長詩的形像,透過這个系統進一步串連,沓沓形成互相呼應的有機體,藝術手路高明。尤其重要的是,詩人所描寫的「阿爸」,觸動咱民族共同的感情,伊所寫出來的,毋是獨獨這位主角「阿爸」,嘛是這位「阿爸」堅強的世代。親像作者的詩句:「用一生炤島嶼的陰影」,這位「阿爸」,就是百年來承受苦難歷史的台灣人形象的總提喻,予人深思、感動。翻頭看戰後臺語現代詩的發展,這類長篇的寫實敘事詩猶真誠欠缺。這首臺語詩成功創造出新的風格,是這屆台灣文學獎真好的收成。
另外一篇金典獎作品〈失落的批信〉書寫白色恐怖受難者黃溫恭先生。這首詩的核心意念囥佇「消失」,對名字的消失、到性命的消失、到遺書的消失,一層一層舖排,「消失」的意念沓沓擴大、深入。 本詩的歷史取材有真特出的眼光,透過詩的取材,予臺語的語詞出現創新的意義。比如:「彼逝名字/銃子射落/掩入土沙」的「逝」字,「未亡人『被踏碎的青春』/如何tháu放?」的「tháu」字,「見袂著/的心悶,縛一線/長長的相思」的「縛」字等等,遮日常字詞攏因為佮作者取材的悲劇現實的牽連,出現雙關性佮歧義性,加添意義到予人有感受的重量。用「實」的感受佮重量,描寫無閣存在的「消失」,這就是本詩高段的所在。這款譴責白色恐怖的詩創作是現今臺語現代詩的一大主流,佇台灣轉型正義落實前,這个題材會永遠吸引詩人的關心。
金典獎以外,另外三篇入圍的詩作嘛有特出的表現。〈一隻尾蝶仔〉書寫白色恐怖受難者蔡炳紅先生,抒情的筆法展現對失去的青春性命的數念,文字功力真好。〈顛倒──阿爸的菜園罔行罔踅〉是一首親情田園詩,透過單純的詩句寫伊對老爸的數念,詩句之中有人生體會,嘛有台灣人對土地對感情的普遍性。〈新美街1號〉是另外一首人物詩,寫詩人白萩過去佇台南新美街生活的日子,文字密度真懸,對景佮對人的描寫攏真熟手、幼路、靈活。遮入圍的詩作,表現攏真好,可惜名額有限,無法度攏總選做金典獎,毋過攏真值得咱呵咾佮鼓勵。