屏東縣潮州人，現時寄居淡水。淡江大學中文系畢業，曾任雄獅美術出版社文字編輯，現任康軒文教集團國小閩南語課本編寫委員，目前是以台語寫文寫歌的自由工作者。2006年發行首張台語創作專輯「一」，台文書寫個人部落格「花埕照日」(http://blog.roodo.com/cit_lui_hoe)。2007年海翁台語文學獎散文正獎。

得獎感言

作品寄出去了後，心內一直誠不安。知影伊無夠好，為啥物無夠好。毋過，總是愛練習放下，愛練習接受。

台語，明明看著是一欉真大欉的老欉，事實上，早就予人斬斷跤筋（根），陰鴆等欲看伊家己倒。見擺掀著《臺海使槎錄》內底，黃叔璥用漢字記音的平埔歌詞，就會想著家己的台文文章，了然，真有可能嘛仝命運：賰奇怪的符號留落來，不可考的語音無了了，過翻過拗的文義寄生佇別種文字。蹊蹺的發展，並非歷史的必然，是台灣人予人毒（thāu）了傷透的結果。老欉欲倒，無聲無說，袂流血流滴；倒落去了後，才會有人發覺彼个所在那會空空，日頭曝落來，覕無路。是講，對慣習守佇冷氣房坐涼的世代來講，老欉大樹的譬喻，已經無經驗基礎好體會，嘛無感情基礎通引起共鳴。 在這个一四界高度開發的世界，屈佇會使講是極低度開發的台文園仔，做的工課，予我感覺真實在。文字、影像、資訊像大水氾濫，雙跤猶踏會著塗肉，誠僥倖。面對華語、英語遮个若「巨人」仝款強勢語言，我時常想起借物少女Arrietty，嘛是愛堅強活落去。佮客語、各族原住民語比起來，台語人一點仔都袂sa-bi-sí，無理由餒志。 得著這个獎，愛感謝的人真濟：台文界的前輩、有志，因為恁眾人的拍拼、粒積，「一蕊花」才有開花的條件，單憑個人的才情是無夠額的。感謝這幾年來鬥牽成的好朋友，無論是同學、同事、網友抑歌友，一併感謝。感謝阿母，生著我這个予妳傷心痛苦的不孝女，但是我有共妳傳予我的台語發揚光大。最後，感謝忘年旅伴L先生，打幫你（daˋ bongˊ nˇ）。