高雄市人。清華大學資訊所碩士，目前任職電信公司。曾任《台灣ｅ文藝》佮《台文戰線》總編輯。得過王世勛文學新人獎小說首獎、海翁台語文學獎小說類正獎佮2008台灣文學獎台語小說創作金典獎。

1995年開始文學創作，初期以北京語小說為主，1996年至2000年發表三篇長篇華語小說《柴山少年安魂曲》、《骷髏酒吧》佮《烏鬼港》。2000年開始從事台語詩佮台語小說的寫作。胡長松的台語文學用寫實的技巧佮台灣的土地、社會、歷史做肥底，追求景致人物的描寫佮音樂性的和諧；另外一方面，伊的小說敘述有相當歐美現代文學技巧的訓練，敢開新路，文字的聲嗽嘛時常變步。

目前伊的台語著作有台語小說集《槍聲》、《燈塔下》佮台語詩集《棋盤街路的城市》等三本。近期伊特別關心台灣人佇長期被殖民的歷史中所面對的生存佮精神的困境與突破，《槍聲》內面的一系列二二八小說作品有相當的代表性，真受著文學界重視，其中的中篇小說〈總司令最後的春天〉被選入加州大學聖塔巴巴拉校區的《台灣文學英譯叢刊》英譯出版。另外，台灣平埔族的精神演變是伊的一個新課題，2008台灣文學獎得獎的〈金色島嶼之歌〉是伊針對即個課題思考的開始。

今年熱天，我為著小說《金色島嶼之歌》的創作有一擺短途的旅行，位東港坐船去到金色的小琉球，走揣四百年前予荷蘭人消滅去的Lamey的跤跡──當然，彼日除了烏鬼洞外的一截失真的碑文，我啥物嘛揣無。熱天的溫度真驚人，親像欲共一切的物件融去，包括殖民侵略者的暴行、Lamey人存在過的歷史，閣有咱真無堅定的認知佮信心。

有學者推論講Lamey社可能屬佇西拉雅，閣較可能是佮馬卡道有關係，所致，成做文獻中第一個予殖民者消滅的台灣部族，伊的故事就有一定的代表意義。我共伊寫落來，尚重要的是欲共家己講，毋通放袂記，因為殖民者的幽靈好定隨時閣來；特別當咱看見伊透過擴大的警檢權力復辟的tsiàng時，咱愛更加細膩，殖民者壓霸剝削的面腔，大體上是接近的。

我坐佇Lamey海墘，恬恬看海對面的大武山懸懸tshāi佇海湧之上，日光所tshio̍h的台灣島嶼，青色的山脈遐爾美麗，我的心肝穎仔，一時浮出特別清醒佮溫暖的畫面，就親像為著家己爸母某子祈禱的時所會使感受的生命的江河，充滿位上帝來的愛、平安佮喜樂，恬靜仔流過即個畫面。我共家己講，毋管按怎，咱定著有出頭天的一日，咱定著愛時常為台灣咱的母地來祈禱！

即篇小說的出現，完全是受著即段時間以來台語文學運動的鼓舞佮牽成，我真感謝國家台灣文學館設立即個有意義的獎項，感謝評審予我的鼓勵，嘛感謝眾文學友志，特別是《台文戰線》的濟濟戰友一路相疼相挺。感謝厝裡的人支持。感謝主，一切榮耀歸予上帝！