2025台語文學創作獎－散文首獎〡吳品瑜
【作者簡介】
府城ê查某囝，走傱世界各國二十外冬，對這片土地有深深ê留戀，現此時寄跤佇德國海德堡。祖先ùi安平鯤鯓佮五條港來，tshàm西拉雅、荷蘭佮漢族，這款陸海相接佮多元基因，予我時時感受母土ê召喚，想欲深入探索臺灣在地ê故事，用母語來傳唱珍貴ê記持，嘛療養歷史留落來ê傷痕，做伙重建精神ê故鄉。受榮格心理學ê啟發，拍拚深掘臺灣ê原型力量，希望破除殖民者ê精神控制，復原島嶼ê主體性。
另外，我用母語佮內心ê查某囡仔對話，這是上溫柔ê藥方，毋干焦醫治過去心靈ê傷口，嘛生出勇氣對抗父權。
著作：《許我一個夠好的陪伴》（1999）
《府城詩人黃欣與他的時代》（2025編審）
獲獎：吳濁流文學獎新詩首獎（台語）、梁實秋文學獎、臺南文學獎華語佮台語小說首獎、劇本暨散文佳作、打狗鳳邑文學獎小說佳作、文化部書寫1960歲月臺灣小說金獎佮散文佳作……。
【得獎感言】
傷痕是花，台文tah-sim文文仔展。
感謝臺灣文學獎賞我這蕊五旬節ê紅牡丹。
〈啞口新娘家己嫁〉毋甘焦是我个人ê初戀故事，嘛是咱臺灣查某人幾若代失聲ê見證。
華語教育就是大中國沙文主義ê洗腦，教示咱愛思想「正確」，綴極權喝咻、應聲，煞顛倒奪走咱用母語共身軀佮心肝對話，逐時自我安搭靈魂ê能力。咱變成啞口，干焦會當恬靜接受命運安排，袂當為家己發聲，甚至用暴力自我凌治，親像美人魚，甘願失聲換雙跤，行入專制安排ê世界，每一跤步攏是流血流滴peh劍梯。
消失三十冬ê前任來相揣，拍醒--ê ，毋是戀愛夢，卻是伊彼截蟮蟲仔斷去ê尾溜仔，佇我心肝窟仔若地牛翻身，共我辛苦khōng起來ê自尊崩去，píng開「無夠好」ê刺字。一直到佇德國教堂，看五旬節ê紅牡丹花瓣對天篷掖落來，我才覺悟聖火真正意義，毋是予人講萬國語言，卻是共家己ê母語抾轉來，那lua̍h-pênn傷痕那講故事，予耳空聽著心ê聲音，解脫恥ê咒讖佮父權ê壓迫。
共母語台文抾轉來，毋是nostalgia，卻是nǹg入去臺灣土地ê子宮，母語一字一句若島嶼ê心跳，予咱回魂，重新受胎、出世。每一个新生ê臺灣囡仔攏值得人疼痛，嘛會當用愛、慈悲共眾人連做伙，變成性命共同體。
咱繼續用母語，療養每一跡傷痕，聊聊仔佇心肝ê空喙，開出上媠ê花蕊。
