2024台語文學創作獎－散文首獎〡林肯輝
【作者簡介】
林肯輝，羅東人。前半世人讀理科，是國中數學老師。五十幾歲才進入叛逆期，決定轉文科，殘殘辦退休研究臺灣文學。當咧躊躇退休的決定是著抑是毋著的時，得著這个大獎袂輸聽著天公伯仔的聲：「退就著矣！」
恐驚後半場的電影看袂了，只好用兩倍的速度絞緊咧看。這幾年拚勢用比賽迫家己學習：台語朗讀比賽訓練「讀」的能力、用台語字音字形比賽熟似「漢字」和「台羅拼音」、台語認證檢驗學習的成果。共遮的能力窮窮咧，欲用台語文來寫故事。
故事發生佇「富嘉美」這間電頭毛店。女主角是阮阿母——電頭毛的師傅，濟濟的人客到尾仔攏變姊妹仔伴；男主角是阮阿爸——修理ia̋n-jín的烏手，有一陣有情有義的結拜兄弟；閣有一个惜孫的阿媽。我佇這間電頭毛店出世，真濟阿姨、阿伯、阿叔同齊看大漢。佇遮，有鹹酸甜彼款的生活滋味，有番仔火彼款的人性光輝。
富嘉美猶有真濟故事，我會繼續寫。
【得獎感言】
細漢時，老師攏會鼓勵較寫作文的同學去投稿《國語日報》。雖然真欣羨，毋過，欠缺自信，從來毋捌嘛毋敢去投稿。
這世人第一擺投稿，竟然就會使著這个大獎，真正予人想袂到。佇電話中聽著著獎的消息，我規个人跤liau手軟。「 敢有叫你共口座、密碼交予 ？」阿母恐驚我是拄著詐騙集團。這世人的運氣，敢會佇這改完全用了了？
一个五十四歲的新人有法度予遮濟前輩肯定，這是真大的鼓勵，予我知影我是會寫的，嘛予我有繼續寫的動力。感謝每一位評審老師。無文學底蒂，無優雅的詞彙，這篇會使著獎，應該是我的故事有一个足無簡單的女主角，彼就是「富嘉美」的頭家娘——阮阿母，是頂一沿「食到老，做到老」的典範，字典裡無「退休」兩字。伊總是講伊這世人干焦會曉共人洗頭爾爾，伊煞毋知影一世人有法度堅持六十冬共一件代誌做予好，是偌爾了不起的代誌。
若講阮阿母是富嘉美的kha̋ng-páng，按呢，阮阿爸就是富嘉美的柱仔。𪜶兩人同齊共這間店楗牢咧。這个獎欲獻予𪜶兩位。
