林彭榮【2020客語文學創作獎〡小說類得主】
【作者簡介】
林彭榮，苗栗縣頭份市人，新竹師範學院畢業， 民國97年教職退休，現下戴桃園。客語文寫作，識得着客語文學創作獎、六堆大路關文學獎、夢花文學 獎、閩客文學獎、桐花文學獎等。
【得獎感言】
2013年長榮航空公司在臺東池上伯朗大道拍一部廣告，金城武 坐在茄苳樹下啉茶个畫面，餳來陣打陣个觀光客，該頭樹仔分人安到「金城武樹」，成為伯朗大道个地標。頭擺吾公田項乜有一頭刺桐樹，像「金城武樹」樣仔種在田脣，一片係青溜溜無邊無脣个禾田，一片係闊野野个河壩，遠方還有青蘿蘿个山崗，該係𠊎同阿公、阿婆做田事歇睏个位所，樹下有盡多美好个回憶。
「金城武樹」揚名該央時，𠊎去田項一輪，想愛尋轉記憶中个田園美景，吂知去到田項心肝嗄冷忒大半，老底个田坵無了，伸着礫礫矻矻無頭無尾个大路，護欄擋在路中央，禁止人員車輛通行，看該情景，心肝當痛，想起過身个阿公、阿婆目汁險險跌下來。
謹以這篇〈啞伯个田〉紀念吾公、吾婆。
