呂美親【創作類│台語散文金典獎】〈佇普悠瑪列車內面 （Tī Phóo-iu-má Lia̍t-tshia Lāi-bīn）〉
個人簡介
日本一橋大學言語社會研究科博士，現時佇台灣師範大學台灣語文學系教冊。捌得著吳濁流文學獎新詩正獎、台南文學獎台語小說kap台語詩首獎、打狗鳳邑文學獎台語詩首獎等濟項；捌參與製作賴和音樂專輯《河》（風潮，2005）、共編《台語文運動訪談暨史料彙編》（國史館，2008）、出版台語詩集《落雨彼日》（前衛，2014）、編譯《漂泊的民族：王育德選集》（台南市政府文化局，2017）。
作品介紹
徛家佇台南，工課佇台北，我逐禮拜著往復台南kap台北。為著省時間，閣也為著加省寡錢，我攏坐台鐵ê普悠瑪khah濟。雖bóng一綴車三點鐘久niâ，正經講，懸速ê普悠瑪無蓋好坐。坐起來無四序，就無通好好仔做工課，只好空思夢想。所致，才有這篇〈佇普悠瑪列車內面〉。這篇散文用台灣歌謠〈港邊惜別〉內面ê「戀愛夢」、「青春夢」、「自由夢」三个主題，來連接我自大學時代tú認捌台灣文學、到tann佇台文系教冊，這20冬來ê一寡心得。〈佇普悠瑪列車內面〉，我告白家己ê無知、憢疑；心內ê滾tsūn、peh腹；對土地ê思慕、對定規ê反逆；毋捌停睏ê走揣，毋敢hìnn捒ê追求；無閣狂熱，毋過信堅ê愛情……。
得獎感言
自10冬前去到東京讀博士班，我ê創作量就減少真濟。研究kap創作，欲té佇仝一粒頭殼內，實在oh得phenn會平。總--是，佳哉逐冬有文學獎，為著相添一寡留學ê所費，我逐冬上少「會寫出」一篇作品。轉來台灣了後，愈來愈無閒ê關係，這幾冬來，我一冬也干焦「寫會出」一篇作品niâ。我kā家己講，上無一冬愛寫出一篇作品，若無是小說，若無是散文。因為寫khah長ê文，才會當真正了解用母語書寫ê困難；才會當真正了解，這个語言，咱到底失落、拍損外濟；才會當真正了解，咱離母語已經外遠。我毋是生成𠢕寫ê人，我是為著「寫台語」、為著「用母語書寫」，才叫家己繼續寫落去ê。
我今年滿39歲。閣來，我就成做一个中年ê婦人人。得著這个獎，袂輸是kap家己ê少年、青年時代告別。毋過，真歡喜家己有留落濟濟ê跤跡，會當真驕傲kā人講，咱對家己會得過。講是按呢講，佇母語ê面頭前，咱欲永遠謙卑。
我欲感謝台灣文學館主辦這个獎，予認真用母語書寫ê人真大ê鼓勵。這篇文，我家己猶無滿意，毋過，誠感謝諸位評審老師ê看重。〈佇普悠瑪列車內面〉所寫ê，是我tuì大學時代認捌台灣文學、到tann佇台文系教學，這20冬來ê一寡心得。講起來，台灣文學體制化行到這陣，也差不多是20冬。我欲感謝這20冬來，所有佇台灣文學這條路裡牽教我、牽成我ê濟濟師長、前輩kap朋友。我特別欲感謝師大台文系，予我佇卒業了後真緊有一个會使結合趣味、發揮專長ê工課。尤其欲感謝咱系ê同學，普悠瑪列車載我去揣恁，我會得kā過去ê眠夢接紲，抑恁，也予我看著未來。
我愛感謝我ê家族，逐禮拜我坐普悠瑪去台北，幾落工無佇厝，兩个囡仔無因為按呢感覺空虛，猶是得著滿滿ê愛。感謝上帝！
閣，知影著獎ê隔兩日，普悠瑪列車佇宜蘭發生事故，我ê心肝tshi̍k真大下。這篇作品內面，也提起著懸速ê普悠瑪列車「hián」甲不止厲害，希望災難予咱得著濟濟反省kap改新；願亡者得著安歇，願生者得著安慰。列車一直往復，夢當然猶未結束。Ǹg望列車，載咱駛向閣khah美好ê國度。
