「阿母拄才khà電話來欲揣你呢!」暗頭仔下班,才入門,牽手看著我,趕緊按呢講。
「啊有講是啥物代誌無?」奇怪,平常時阿母真罕得khà電話來,敢講有啥物要緊ê代誌?
「無咧,伊kan-ta吩咐講,等你若到厝,才khà轉去予--伊。」牽手頭tàm-tàm,無閒咧款暗頓。
自三冬前阿爸過身了後,就tshun阿母家己一人蹛佇庄跤ê舊厝,有幾仔擺咱koo-tsiânn伊來市內kap咱做伙tuà,較有伴。毋過,逐擺攏來無幾工,伊就喝無聊,袂慣勢規工宓踮厝裡底,親像關佇鳥籠仔內咧,無厝邊頭尾通話仙,吵欲倒轉去……
咱做人序細ê,嘛毋敢傷勉強,是講放伊一个八十歲ê老大人,家己一人佇厝裡,按怎講嘛袂放心。所以,除了假日盡量轉去陪伊以外,逐暝我攏會佇固定ê時間,也就是民視八點檔連續劇做suah了後,khà電話予伊,kap伊講寡話,講了,伊就準備欲去睏矣。
「是講,昨暗才kap伊講過話niâ,那會今仔下晡隨khà--來,敢是臨時發生啥代誌?」我袂赴去便所,趕緊khà--轉-去。
「啊都恁三姑昨暝佇浴間仔無細膩去乎跋跋倒,送去奇美,醫生講伊腰脊骨tsi̍h去,著愛入院、開刀。你這禮拜若有轉來,才順紲載我來kā看--一-下。」聽阿母講,才知影伊趕緊咧揣我ê原因。
三姑今年九十矣,自阿爸過身了後,怹彼沿就tshun伊這个親情序大。在來,kap阮這頭感情就真好,莫怪阿母會煩惱。
三姑是阮阿嬤相連紲生ê六个查某囝內底排第三ê。阮六个阿姑內底,除去一个細漢去予毋好去,晟無大漢以外,有四个若毋是嫁佇kap阮仝庄頭,就是蹛佇隔壁庄,袂輸厝邊頭尾咧,去怹兜就親像去阮厝ê灶跤仝款,無啥物希罕,Kan-ta三姑嫁上遠。 其實講遠嘛無偌遠啦,平平攏是阮查畝營十二聯庄其中一个庄頭——跤腿仔。不而過,阮兜東勢頭是佇查畝營ê較西爿面,跤腿仔倚較東爿面,二个庄頭相差十外公里,若是這時陣駛車,差不多十分鐘就到矣;毋過彼當時行路,就愛三點鐘久搭搭。
「跤腿仔」這个有淡薄仔奇怪ê地名,根據專家學者ê研究,是對平埔族西拉雅語原意「Nounog」翻譯過來ê,意思是:「雙溪合流ê所在」。也就是講,這个所在,有白水溪kap龜重溪兩條溪水佇遮會合了後,才閣做伙流入去急水溪,親像咱人拍開ê雙跤仝款,所以號做「跤腿仔」。