2023台語文學創作獎｜小說〈相伨〉
〈相伨〉/林連鍠
規个庄頭，猶閣予夜色罩甲褫袂開目睭的時陣，就算講佇冷吱吱的十二月天，春仔嫂灶跤的電火仝款佇透早三點外就光iānn-iānn。
先共龍眼椏絪好的草絪囥入去灶空，才閣共竹管仔柴囊入去，番仔火點落去，龍眼椏袂勘得熁著火，就piak-piak叫，著起來矣。
天猶未光的透早，陪伴伊的，就干焦賰草絪著火piak-piak叫的聲。
自春仔過身了，阿成就去臺北拍拚。
「唉！」共前一暝浸甲蓬蓬的豆仔，欲倒入去豆仔機挨的時陣，春仔嫂常在那吐大氣那倒。若春仔猶佇咧，一下手就會當共規桶的豆仔倒入去，毋免像這馬，干焦會當用匏桸沓沓仔khat。
紲落來，一寡豆仔汁摻石膏做豆腐、一寡就倒入去灶頭的大鼎用勻勻仔火燃予滾，就會當做豆奶賣。
灶頭邊一个一个的鍋仔，彼是人前一暝注文欲貯豆奶的。
燃豆仔汁的火袂當用猛火，若無就會浡（phū）甲滿塗跤，愛那顧火那共豆頭抾入去袋仔底，等一下阿海就會來載豆頭轉去飼牛。
「呔會遮久無看著恁阿成？」阿海按呢問。
「我叫伊若無閒就莫轉來啦，工課較要緊！
＊詳閱完整得獎作品請下載附件
附件下載
