2023台語文學創作獎｜散文〈白頭鵠仔〉
〈白頭鵠仔〉/王永成
光顯顯的月光暝，天邊規群星寬寬仔墜落去，一粒、兩粒、三粒……猶袂算淸楚就攏無去矣。
「換你畫啦！」H左手黜我的肩胛，正手捀一杯酒，酒芳衝甲規四界，彼是伊叫三八仔（酒精38度）的金門高粱。
敢若是佇in厝的畫室，阮共一捲宣紙裭開對內底沓沓仔搝出來，一人畫一尺，十外歲的土狗仔Puru佇邊仔金金相，直直吠。
無偌久畫甲盡尾矣，拄好搝來到老蘋婆（phîn-phông）樹跤，H喝講落款頓印仔。窮實是啉甲茫茫矣，所落的款攏無啥成字。
雄雄一隻頭殻心白白的鳥仔對樹頂飛落來，左爪正爪搵印泥，頓兩个紅記記的印號，翅股pi-phiak叫閣飛出去矣。
「有頓就是無頓，按呢，省事啦，來來啉酒啉酒。」
我攑頭看，H的頭殻額牽三巡，喙齒閬兩縫，那笑那霧去霧去……，原來是咧陷眠。
H已經過身一冬矣，伊比我較少年較勇健，為啥物遮爾早就過身去？我仙想想無。有一段時間，我誠是無心思做工課，一寡計劃佮答應的邀稿攏先暫且按下，腦海中伊的形影直直轉踅，一直甲半冬後才沓沓仔回復精神。
＊詳閱完整得獎作品請下載附件
附件下載
