〈永久个頭擺〉/何志明
掛念,係囥到心肚个蟲,偷偷撂撂,嗄輒常出現,當會摝人,從頭
到尾毋肯離開。
𠊎當細个時節,就曉得一儕人个孤單。
阿姆盡早同阿爸離婚,這件事情過忒無幾久,阿爸帶等𠊎去探望
姐公,姐公戴在苗栗銅鑼鄉个村莊。食飽晝,大家坐在坍墀坪肚譫哆尞
涼。忽然間,姐公提起吾爸同吾姆分開這件事,佢問𠊎會難過無?𠊎應
話迪迪凸凸,雖然嘴講:「毋會,𠊎毋會難過啊!」其實心情重鈂鈂,
頭犁犁仔,當愠悴。
年長月久,事過境遷,該擺一句單純个話語,也分時空阻隔忒,變
做遺憾。無想著年華這下已係龍龍鍾鍾,包尾連憂傷也緊來緊熟絡,好
比舊相片裡肚个阿姆,不論佢開容笑面个表情,係哪種歡喜,背景都係
共樣个蒼茫。𠊎想到佢个時節,𠊎就係佢,就算無聲乜做得聽著。
吾爸四十零歲正討心臼,討著二十歲个吾姆。佢兩儕結婚後感情當
毋好,長透相罵,齬齬齖齖,一滴仔細事乜會冤家,詏嘴相吵時,阿姆
譴到會死,動啊著斯亂擲東西,廳下分舞到鬞鬞。就像頭擺人講:「一
尺風,三尺浪!」歸日到暗都在起風天㧡禾稈,刈刈惹惹。無想著佢兜
个婚姻,竟然行到無救个地步,阿姆堅持愛離婚。
*詳閱完整得獎作品請下載附件