得獎感言
感謝評審對〈鬼貓仔〉的肯定,回顧以客語創作已超過十年,最常發表的文類是新詩,但也深怕自己的創作落入窠臼,無法推陳出新,因此這次嘗試以不常踏入的領域-客語小說來投稿,也可說是對自己的挑戰,能得獎確實難掩心中的喜悅。
〈鬼貓仔〉是以臺灣已絕種的動物-雲豹為主角,並連結目前也瀕危的動物-石虎來發想,以現代人穿越時空變成雲豹的遭遇為主題,可說是一篇涉及動保議題,更屬天馬行空的科幻小說。這在臺灣文學中已屬異類,更別說是在傳統上相對保守的客語文學。如今出乎我意料之外能出線獲獎,評審們確實具備過人的膽識及勇氣,只能在此表示敬意及深深的感謝~
〈鬼貓仔〉
1
1910年交秋,臺灣苗栗到臺中个山排,既經係一大片紅羅花色合合共下个圖畫,楓樹、Hinoki、松樹、杉樹……,還過樹叢肚靚靚个花、草、果子,為這原始个山林獻出一份特別个景色。高天天个大樹遮等日頭,該日頭光照毋著个位所,乜有溜苔弇等;像一層暗青色个地毯共樣。
半天高个山頭,係盡多河壩个發源地,單淨這條山脈,就有五、六條輒常嘩啦嘩啦个細溪水流經過。行入這一片從北到南;綿延幾啊十公里个山脈,熱天定著會聽著;歸片唧唧響毋會煞个蟬仔聲。寒天就看山櫻花開到漫山遍野。當好喫食樹皮个膨尾鼠,就在高高个大樹杈椏頂背跳上跳下。
這時節山肚个山豬、山羌、烏熊還不時出現在山排水邊尋食。山肚葛藤滿哪仔爬,因為山崎地勢較高,野草無像山腳下生到恁紛亂。毋過槳草、山芋荷摎金狗毛這兜樹草,還係占忒大部分个山林壁角。