客語文學創作獎－小說｜〈講真話〉

字級： 小 中 大

得獎感言

這篇小說，記錄著頭擺後生時節个一段故事。……

小說寫好，𠊎拿分朋友看……。

「該裡背講个係真个抑係假个？」

佢㐁長舌嫲毋敢相信个問𠊎。

「係啊，𠊎乜毋知該下自家仰會有恁樣个戇膽哩？」

𠊎應佢。

「確確實實係𠊎經過个……。」

𠊎講。

「唉，麼个都係命。」

佢敨著一口大氣。

「你前世毋知積著麼个恁多該福報？」

佢搖搖頭那講等。

「人心啦……。」

佢像盡有感觸个講等。……

著，這篇小說，𠊎愛講个就係人心。……

有人講：𫣆人一生人對事情有三個無共樣个看法──還細个時節，見山就係山。大咧，見山嗄毋係山。到老吔，見山還係山。

仰會恁樣呢？原來，細人仔無經世事，毋知頭天，佢相信自家目珠看著个。漸漸仔大吔，堵著个人多咧，經過个事情也多吔，分人教精咧，面對世界，佢心肝肚彎彎斡斡有盡多个想法。……

這篇小說借著一個到澎湖做兵个預官，用佢天天──最單純个心，去面對複雜人心个經過，戲劇樣个「奇遇」，分人深省……。

得獎，愛承蒙一路項遇著个菩薩……。

〈講真話〉

「財務官，若爸係……？」

坐到橫桌仔項个行政官細聲細義个探過頭來，細細聲仔問等頭前脣頭坐等个阿科。

雖然來到單位，坐到這隻辦公室也無幾久，毋過佢看多吔行政官个色相。──大擘擘仔，動啊著就抨抨滾个當面剷人，一息仔都無留情面。辦公室對軍官上來，下到細兵卒仔、雇員小姐，大家都閃等佢，最好毋使摎佢有麼个交攞。毋過，行政官管个東西盡多，基地肚微毛末節無專門單位管个事情，通棚都係厥个工作。故所大家一無細義毋堵好觸著佢來，該就死無命吔那。──佢敢連若祖公八代都罵等下來，挖出千年个狗屎乾來咧你。……