得獎感言
自細漢就愛聽人講古,若無古通聽就家己編故事。
雖然身體無好,毋過罕得蹛院,這擺為著寫稿,共家己舞甲致著蜂岫癰,實在是料想袂到的代誌。佳哉文章有完成,佳哉文章有著等,閣較譀的是佇觀察室五工,拄著來自各地的病友,因為布簾仔閘咧,煞袂記得『隔牆有耳』。In對布簾仔傳過來的話語若像鬥圖,拄好予我共腦池內底一塊一塊的圖片鬥予完整。
咱毋是咧探人隱私,無定著家己嘛是別人的鬥圖之一,In講病人愛歇睏,毋通一直huê手機仔,毋過我若無緊將遮的代誌寫落來,以後的人哪會知影原來COVID-19這个世界性的病毒遮爾tshiòng-kông,共病院舞甲捙跋反,希望這个「人災」緊平息,予病院內底應該得著救治的病人,攏得著完整的治療。
〈院之囚,籠中鳥──觀察室五日〉
110/11/26(五)
觀察室,佇遮看的是人生百態,咧共學生講笑話的時攏講「棺柴室」,其實蹛院毋捌蹛到對觀察室來,窮實是大病院太ka-ia̍ h咧,暫時無病房就愛佇遮沓沓仔等。
薄薄的布簾仔圍起來的就是一个故事。倒爿床的是老爸顧囝,新冠肺炎的關係,干焦會使固定人顧,而且愛PCR採檢陰性的才會使。老爸一直無愛做PCR,予護理人員真為難。等護士離開,才聽伊咧唸囝:「食甲欲40矣,規日毋討趁,睏日時啉暗時。少年袂曉想,食老就毋成樣。這陣無趁,錢一直開佇酒裡,用酒來予家己好睏......」囝共老爸應:「啉酒嘛無較好睏啊!我就是歹睏
毋才會出去so̍ h,無欲創啥?」