臺語文學創作獎－新詩｜〈所在──寫予「玫瑰古蹟」 佮蔡瑞月老師〉
得獎感言
若是落雨的時
練習留一寡時間
佮家己做伙
佇沓沓滴滴的所在
想一寡代誌
若是孤單的時
練習用恬靜的筆
寫一寡代誌
佇深深深深的暗暝
唸予月娘聽
〈所在──寫予「玫瑰古蹟」佮蔡瑞月老師〉
1.有一寡所在
（幕起。舞台頂的伊，敢若咧想啥物……
目睭金金，看著衫仔櫥的バレエドレス）
欲上台的彼領衫，有一寡所在
猶未紩好勢。時間踅神，一時揣無線頭來拍結
窗外，雨絲──親像一枝一枝躼躼長的魚釣仔
毋管心事按怎藏水沫，猶原無法度走去覕
「佇佗位？」，會記得是……
向時，彼个思想進步發彩的年代
島嶼的文學、美術、戲劇全全猛醒開花
日本的石井漠先生做前，朝鮮的舞姬
崔承喜隨後，佇臺南宮古座的舞台頂
跳家己的舞。啊……樂暢的身軀
原來是自由──自由流動的修辭
舞台跤百百蕊的目睭嶄然仔精神
斟酌看著未來，夢想的跤步
現代的手路
