〈疫情時節 講「發」字〉
頭擺人,畜雞鴨風性毋好,發雞瘟安到「走大水」;頭擺人講:「還『發
瘟1』正得!」;罵人:「你這隻『發瘟病2』。」還有罵人牛腸馬肚3圖㘔4个
人:「你這隻『死㘔瘟5』。」
「發瘟」係講人類、頭牲仔,一種急性个傳染病。像「人瘟」、「雞瘟」、
「鴨瘟」、「狗瘟」、「牛瘟」、「豬瘟」總下係會死个。若罵人:「你這隻死
㘔瘟。」就毋係因爭發人瘟來死,若係會死,定著乜係「豬撐大,人撐壞。」豺
食6「撐死」个。
講著「發人瘟」,對舊年(2020)年下仔到這下,驚動全球个新冠肺炎疫
情,當在全世界七大洲五大洋裡肚竄竄轉。世界係一隻地球村,加勢出出入
入,人千人萬一日千里个流轉,各國吂識講,嚴重到愛封鎖城鎮同邊境个管
制,人心慌亂搶買物資,一部電影名安到「世界末日」,就生活活仔在真實个
生活中上映。
臺灣,當然也無恁該免毋受著疫情个影響。滿掖疫情个大環境裡肚,全世
界个生活摎經濟運作,產生空前个極大變化,緊來緊嚴重看無著尾个疫情感
染、驚人死亡个數目增多,乜脫體受著世人个驚心摎注目。
疫情一下起勢,並無試著摎𫣆有麼个大下直接關連,因為佢安到大陸个「
武漢肺炎」,貼貼到病例連峨接棟在臺灣出現,該時𫣆人正昏醒「發人瘟」个
嚴重性!當大下个人,看著世界各國死在「武漢肺炎」个人數節節升高,正分
𫣆見識著,新病毒个存在,摎分分秒秒對人類生命个威脅。「武漢肺炎」並毋
係一般小可个寒燒感冒,世界各國無分人種、貧賤富貴、靚媸高矮、老嫩大
細,凶狂無情个遰穢7開來,眼時間8無解藥、無預防射好注,世界項日見日死亡
个人數緊來緊多……背尾,世界衛生組織摎「武漢肺炎」新正名,安到「新冠
肺炎」,一隻新改个名仔,並無帶來改善摎疫情个滅亡,顛倒使致人心亂交交
仔,臺灣人民配合著政府放送个防疫政策、控制病源、改善環境同消滅病毒來
做:
為著隔離病毒个侵入,強制戴嘴揞仔,隔離病毒經由口涎遰上身為第一
先,準講透日仔戴等嘴揞仔翕熱9又毋鬆爽,毋驚一萬,斯驚萬一!風狂浪大个
時節,大家就坐在共條船仔頂高,準確个揞嘴揞鼻保護好自家,隔離病毒乜係
行善積公德。毋止恁呢,逐日還愛確實磅10體溫,毋好超過37.5℃;二來愛養成
輒洗手个強烈意識,改變平常時像「蘸豆油11」見水三分淨个洗手方式,一空一
撂12愛洗畀清淨;過用75%个藥用酒精加強消毒,因為病毒像鬼仔,囥在𫣆人看
毋著个所在;再來,疫情並毋係一齣「份家啦飯仔13」,強調保持社交安全距
離,避免大眾接觸个活動。
*詳閱完整得獎作品請下載附件