〈Sîn 話鬚仔〉
(一)
2020年ê春天,袂輸是14世紀瘟疫四界湠ê歐洲。為著顧性命,逐家自按呢
攏盡量kā家己關leh,城嘛時行封leh,甚至國ê邊境嘛鎖leh。一直chhongpōng
無閒teh pha-pha走ê腳步自按呢放慢、恬靜落來,咱嘛chiah有機會聽著咱
心內ê聲。舊ê世界、舊ê價值、舊ê理論規个攏大走山去矣,新ê天地、新ê想法
毋知是生啥物款?
永過彼陣Italy城市ê圍牆是遐呢懸、遐呢勇、遐呢厚,有法度擋住任何火砲
ê攻擊,毋過按呢kám著會保障怹ê安全?毋知影ùi當時開始,佮親近ê人手牽
手,按呢相攬相唚,紲袂輸是邀請死神來跳最後ê Tango?一下講再會了,嘛毋
知影tī時會koh再相會?遐呢濟熟似ê人影,古錐ê bah吻笑攏猶未相辭leh,死神
毋知tī時雄雄to現面,隨kā怹攏掠去藏。紲予人心內一直起僥疑:穿媠媠,抹香
香(phang),人khe̍h人ê繁華,kám講攏是誘拐予人òe著病自按呢死去,一
張上jio-toh ê包裝紙?予人囂俳(hiau-pai)ê金錢、權勢、地位,佇死神ê面頭
前,beh哪有較差(khah-choa̍h)啦?本來市街ê人一直是按呢挨挨陣陣,鬧
熱滾滾,睏一醒精神起來niâ,彼款著人che ê恐怖佮驚惶(kiaⁿ-hiâⁿ),自按呢
攏予人放捒(sak)現空城。性命是遐呢軟弱(nńg-chiáⁿ),大風一下來隨時
吹hoa去,最後猶會記得啥?彼陣十个少年家疏開去庄腳,足無聊ê時,怹用
Tuscan上親切ê話來講古,逐工予無仝人輪流來做莊官(chong-koaⁿ),無論
是外譀(hàm)、外古錐、外笑詼,總是予人一點仔溫暖。佇彼个讀冊人攏干
焦知影拉丁文ê時代,怹ê聲音予人記落來矣,kám有人知影怹是teh笑啥貨?是
teh煩惱啥代?彼陣少年家嘛毋知影講,怹ê形影無意中予小說家寫落來;小說
家覆佇桌頂那寫那笑ê時,嘛毋知影講he是現代 Italy文ê開始,甚至幾nā世紀以
後ê人kā伊彼个時代號做文藝復興。遐ê話鬚仔拍算藏佇玻璃矸仔,遐ê笑聲、吐
大氣ê聲自按呢予伊佇茫茫ê大海bo̍ k-bo̍ k泅,嘛毋知beh流外遠、等外
久,chiah予人抾著?
*詳閱完整得獎作品請下載附件