〈「你對佗位來?」〉
「你對佗位來?」
我對南部來。選擇,原來有一種無奈
親像佇家己熟似的故鄉流浪,有一種
講袂出喙的,悲哀。我是政治的傀儡尪仔
嘛是國家的棋子,定定毋知後一步
應該安怎演、安怎奕
生活才會簡單,日子才會平安
性命,袂輸漂浮佇闊莽莽的海面
看袂著彼葩光焱焱的照海燈
「你對佗位來?」
我對第15號押房來。佇這款恐怖的年代
連溫馴的月光嘛會予人關共陷眠
連櫳仔內的蟮蟲仔嘛會變共戇神
好佳哉,有時風絲仔微微
吹過來記持中的一陣芳味
親像故鄉的長流水,切袂斷
你我的相思。便若是遮邇仔
恬靜的暗暝……,我就會想起
你的長頭鬃佮你的目眉
遐爾仔柔軟倚佇我的下頦
你講:「毋管世界有偌害
只要咱做伙,眼前就有好未來。」
這馬,只賰我家己,目睭金金
䖙佇壁邊挲肚臍。毋知影明仔載
到底是意外會先到,抑是
拍殕仔光會對彼爿的山頭,代先
軁出來
*詳閱完整得獎作品請下載附件