〈啞伯个田〉(四縣腔) / 林彭榮
一隻八月个暗晡,風搓吼天吼地吹到山城,狂風暴雨乒乒乓乓掃 一路過,到下夜風雨正漸漸仔停下來。上埔莊个樹仔橫个橫,斷个斷,樹桍瓦析四四散散,電線襤襤吊吊,莊仔一片荒涼。
莊頭下街仔㧡水崎,溚溼个石枋路彎彎勾勾透到坑壢。半崎仔一 間泥磚屋,屋頂分風掀忒一大析,桁桷看現現,瓦析浪浪散,翹翹橫个竹籬笆,吊等幾條菜瓜藤幾皮爛葉隨風搖擺。
啞伯姆擎等祛把在泥磚屋前拚掃,佢人細隻細隻,腦屎背盤一隻髻鬃,一身青布衫早洗到走色,三不二時臥起頭,看兩個倈仔跍在屋頂蓋瓦。佢摎瓦析葉仔掃歸堆,拿等祛把行到門口,探頭看一下石崎 仔,唸唸唸唸講:「風搓恁大噢!田毋知有仰仔無?若爸恁早去巡田水,仰吂轉來?」㧡水崎恬肅肅無半隻人影,啞伯姆斡轉頭行到豬欄下擐出一隻畚箕,摎成堆个瓦析葉仔掃落畚箕肚,正想愛抔出去,突然間大門口「吱──喀啦」一聲,一台自行車停在門碫下,佢知老公巡田水轉來了,畚箕放啊忒,行前去愛問啞伯田有仰般無?
*詳閱完整得獎作品請下載附件