〈1945.問仙〉(四縣腔) / 張㨗明
1949年,在深山肚个山林壁角,有一個安到桂竹坑个所在,該位个山路當嶇,故所有當多石碫仔崎,該位人生活清苦毋過當樂線,係一個世外桃源。
有一日竹林肚正落過雨毛水个石碫仔,傳出山歌聲:
「山歌毋唱想毋來,老路毋行生溜苔;
腳踏溜苔踣踣跌,知路恁滑哥毋來。」
係一個後生阿哥唱个,唱山歌看起來毋使出力,毋過佢這下肩頭無輕鬆,用蔗夯擎等一截香絲樹个大樹筒行往下,怕有百空斤。石碫仔脣項生溜苔,佢踏穩一碫正細義踏下一碫。肩頭有恁重个負擔,嘴項還做得唱山歌,實在無簡單。
「阿鑫牯,會重無?」路脣个竹園肚有一個拗竹筍个人,乜係細阿哥仔,安到阿炎牯,一聽係同年7唱山歌,就出聲頂碓。阿炎牯生來細隻幼秀,揹等一大袋桂竹筍在無好落腳个桂竹園肚,穿上穿下當溜掠,像行灶下。
*詳閱完整得獎作品請下載附件