〈毋捌ê〉 / 陳正雄
敢欲相信,時間已經超過六十冬矣,年紀應該嘛欲倚八十歲矣。毋過,這幾十冬來,除了伊ê面貌、體型,看起來有加較無仝,伊ê生活、習慣,會使講完全攏無改變。除了做風颱、落大雨,抑是真特殊 ê原因以外,伊猶是逐工透早就出門、天暗才轉來。伊毋是無閒咧食頭路、做工課,是四界去賴賴趖、拋拋走。
因為一直無人知影伊ê名姓、嘛無人知影伊ê身世;伊對任何人、 任何代誌,嘛那親像完全攏毋捌,所以庄裡ê人,久年來攏慣勢叫伊 「毋-捌--ê」。
毋-捌--ê,聽講是佇「八七水災」了後無偌久,有一工hiônghiông 出現佇阮庄裡ê菜市仔。
伊看起來量其約仔佇十七、八歲彼个跤兜,人生做粗勇矮頓、烏面闊喙;一軀衫褲thái-ko-nuā-lô、規个身軀oo-lô-tsiap-tàng,應該是佇外口流浪誠久矣ê款。
伊日時佇菜市仔趖來趖去,一下仔看人咧刣魚、切肉;一下仔看人咧揀菜、洗蔥。有時陣,徛倚路邊擔仔恬恬仔看人咧賣物件;有時陣,坐佇亭仔跤裡戇戇仔看人咧食點心。
伊毋捌開喙kâng討、嘛袂去伸手kâng提。有ê人驚伊無正常,見若看著伊,就趕緊離開;有ê人嫌伊無清氣,影響著生理,會共伊趕走;嘛有ê人看伊誠可憐,腹肚枵無通食,會分一粒肉粽抑是一个碗粿予伊。上特別ê是,伊會四界去抾人擲thó-kak ê薰頭來suh。
*詳閱完整得獎作品請下載附件