王永成
筆名王羅蜜多。淡江大學中文系畢業, 南華大學宗教學碩士。
歷任臺南縣( 市) 政府民政局課長、戶政事務所主任等, 已退休。
曾獲臺文戰線文學獎新詩、小說頭獎。閩客文學獎社會組小說、散文
首獎。臺南文學獎臺語小說、華語新詩首獎, 各縣市文學獎多次, 以
及乾坤詩獎、金車詩獎等。作品兩度選入年度臺灣詩選。
已出版詩集< 問路 用一首詩> < 颱風意識流> < 鹽酸草> < 王羅蜜多截
句> < 日頭雨截句> 等。
熱衷藝術創作, 曾在畫廊、縣市文化中心、美術館等個展十餘次。
得獎感言
用母語思考,讓我能挖掘生命經驗中最深層的話語,轉化為文學創作。
幾年來的臺語文作品, 可說源源不絕, 多數發表在臉書上。
參加臺灣文學金典獎,2 0 1 7 年臺語小說入圍、2 0 1 8 年臺語散文入圍,
今年終於得獎。欣喜之餘, 也須自我鞭策, 期盼寫出更好的作品。
這次主辦單位對詩創作沒有行數限制, 使我能提出長篇敘事詩參賽,
並倖而獲獎, 感謝評審老師的肯定。
布袋
1
六月的日子㴙㴙滴
貓咪仆佇窗墘,神神
看天公流目屎
有時哭兩三聲,像阿爸
咳嗽,㧎佇嚨喉
貓咪坐佇布袋頂
爪兩三下,等汝
挲腹肚邊才欲睏
阿爸,貓咪袂記得
汝已經離開欲一年
布袋喙原在攝襇
抽出的線,汝的一生
到甲七月做忌
閤再㨨倒轉來
2
舊年的七月十四
䖙佇性命的落尾站
等天堂班車
阿爸,汝的兩爿肺
是兩跤布袋,內底
窒滇滇,一生的苦難
班車欲來進前,受洗
阿爸,放輕鬆
布袋已經空空
欶入來清氣的風
誠心爽
阿爸,貓咪仆踮
汝的身邊,祈禱
3
尾溜幌一下,貓咪
徛起來,雨水暫停
思念已經瘦卑巴
貓咪,上老的守衛
帶身命,用做人的本份
共一棟公寓當做城堡守護
終其尾,阿爸的一生入佇
一跤小布袋,錦囊的言語
閃熾熾
貓咪,佇這个島嶼的七月
南風溫柔的聲音佮行踏
親像天使的安慰
4
佇遮,汝堅定的眼神
有北極星的光
祈禱的聲音一湧一湧
捒來海沙埔
汝用一生炤島嶼的陰影
濺出不可思量的浪花
勻勻仔落落港口
拍開布袋喙
一港悲慘的故事濆出來
1946年,落吐症侵入
國家武力封鎖庄頭
人命比野草較臭賤,阿公
著落吐症,死佇機關銃
這時陣,佇另外一个布袋
關廟的拍鹿洲仔,阿嬤參汝
避過災厄,生湠落來
阿爸,貓咪也做伙來祈禱
5
香的芳味勻勻仔捲起去
汝擔頭看天,用小虎的跤步
踅山邊,貓咪
阿爸阿嬤踮八角寮
用布袋針共必裂的命運縫紩起來
山坪坎坷,竹枝尖利
手捗的性命線像溪溝
跤蹄,踏甲出血
貓咪,布袋袋筍仔、山兔、山貉
袋一个家族的業命
貓咪,一間破草茅,一窟
摸田螺洗身軀,舀來煮飯的水
浮游兩个袂安隱的心
這款的年代,汝敢會知影
6
獻一束台灣連翹予汝
阿爸,硬骨無向運命頕頭的連翹
是汝的本命樹
1947年,臭臊色的春天
阿嬤佇市內的親情
紮白死殺的面腔來覕佇草茅
八角寮的暗光鳥毋敢出聲
竿榛的夢冬丟仔咇咇掣
暗暗仔問,這馬是民國幾年
阿爸,彼工拍殕仔光
沈重的影,予命運的鎖練搝出去
汝仆落,拖袂倒轉來
干焦滒規雙手的血跡
阿爸,彼時陣汝雄雄知覺
長閬閬的性命線
會無張無持,旋向坑谷底
7
坐落來,挲尻脊
貓咪,一个布袋拆破
閣再紩,傷痕密密是
阿爸疊的衫,縖的褲
攏是布袋的身屍
十五歲,無阿祖通挲尻脊
無老爸老母的痛疼
一路走傱,倚靠大目降的親情
阿爸用手刀跤盤犁田
命底,番薯一稜一稜
向望對坑谷底控上淺窟仔
貓咪敢知影,阿爸流的
毋是汗水㴙㴙滴的鹹,而是
對潘桶摒落來的酸臭
8
阿爸,咱幾若代的業命
牽去到布袋的線頭
1915年,左鎮內庄的寡婦村
查某阿祖,噍吧哖事件連累
無倚無靠的查某人
入十外跤布袋來大目降三角湧
予羅漢跤仔撿
命運,閣向北
牽過八掌溪漂浮去布袋港
這个家族仔,布袋命
是業,就愛修
經冊一頁一頁翻過,像海湧
祈禱的聲音踅上天頂
阿爸
汝有信有義,應該佇上帝身邊
9
貓咪目睭金金相,眨眨𥍉
思念依倚的日子
貓咪汝看,阿爸的墓牌敢若
一座四正的孤島
徛佇一片歪斜的世界
欲看,頭愛敧敧
貓咪汝看面頂,阿爸的文字
清清氣氣,公平正義
是有骨有肉,四四正正
猛醒有力的書法
汝敢知影,布袋內底
有蕃薯也有文字
長工歇晝鼾鼾叫,逐時透濫著
阿爸自學的,讀冊聲
10
散赤的歹命囝,親像黃麻
浸臭水剝一層皮,曝焦
絞做一條有路用的索仔
阿爸,汝是國法的索仔
共匪徒綁轉來
大人的時代已經過往
這馬是百姓的保母
毋過阿爸,汝後面不時拖
一个烏影,內底
阿嬤入佇黃麻的布袋
用牛車車轉來
汝毋敢回頭看,汝恐驚
命運的索仔一代一代
閣綁做伙
11
貓咪躡跤尾,𢯾墓肩
貓咪汝看
墓牌頂的相片,警察服
掛箍二
佇清明的天頂,是堅定的
目睭,有北極星的光
換過來,烏暗的社會
就變做兩隻火金蛄
歇胸坎,佇大寒的暗暝
騎老鐵馬巡邏,踏過
頭前溪的破枋仔橋
貓咪,汝敢知影
北極星,比如自信的眼神
火金蛄,就親像清廉的標誌
箍二,永遠的箍二
是阿爸,另外一个名字
12
七月時,墓園的籬笆
籃仔花一捾一捾紅帕帕
阿爸,逐時欲暗仔
五个囡仔等候鐵馬
硞硞,轉來
籃花絲幼麵麵,花粉
黃澄澄,耍甲歡喜
阿爸,黃澄澄的猶有阮
田嬰牌的衫,駱駝牌的褲
攏滒阿啄仔麵粉味
阿爸,一陣囡仔
穿麵粉袋仔傱來傱去
閣親像布袋戲
13
頭敧敧,仆踮胸前
彼段褪腹裼走牛車路
的日子
貓咪,廟埕有鑼鼓聲
規陣囡仔跍佇戲棚跤
毋知啥物神做生日
干焦知影布袋戲
東南派的義士捙拚
西北派的妖道
賣唱書生走風塵
講話欲哮欲哮
上𠢕彈琴,魔音傳腦
唷呼,迸迸迸
逐家掩耳空
貓咪,規群貓咪
傱去戲棚下跤覕
14
四个查甫囡仔
兩个活骨,兩个恬恬
一个查某囡仔綴人行
阿爸,一水囡仔
穿布袋看布袋戲
無疑悟,一條布袋線
牽到1979年
束佇內面的蕃薯
弓破布袋
阿爸,佇茫煙散霧,迸迸叫的
美麗島,汝的囡仔
也捌喝甲梢聲,流血
阿爸知影,彼齣毋是布袋戲
15
貓咪汝敢知,阿爸
有時鬱卒聽音樂
破曲盤,踅踅唸
阿母逐時,鹽鹽鹽
清廉,規家伙食飯攪鹽
註冊傱錢,汗水㴙㴙滴
面腔全是鹽
壁角的收音機
賣鹽順仔也喝鹽,鹽
鹹鹹梢梢的聲迵過布袋
豉身軀,予阮軟𩛩𩛩
親像泅袂振動的魚
16
八角寮仔的彼窟水
洗衫洗身軀掠魚
想著誠腌臢
這窟,凡勢閣較濁
阿爸誠骨力
四常幫忙搬厝,清糞埽
薅菜園,只是
怹的面腔,有曖昧的田陵
烏陰烏陰
阿爸,汝漸漸明白
清氣水,沓沓仔濁去
菜葉慢慢仔蛀空
內底的蟲有仝款的聲說
細膩,有一尾害蟲
阿爸,我知影
汝毋是蟲,是掠蟲的人
17
貓咪,誠濟人愛聽講播劇
呵咾廖添丁有輕功
汝敢知影,掠賊的阿爸
上愛廖添丁的義氣
貓咪,阿爸的功夫
白鶴拳108式嗄嗄叫
三尺的鎖鍊紮褲頭
串攏孤身人去掠跋筊
半瞑三更,無聲無說
衙門軍用狗,當落眠
阿爸抄筊場,齊移送
村長,議員,長官
額頭浮青筋
貓咪汝看,青筋
敢會勝過鎖鏈
18
鎖鏈的頭捌無去
我閣抾轉來
阿爸,命運共一條鏈仔
紡來紡去
無仝款的時代
有時,紡來箍著家己
阿爸,汝掠著食毒的
有勢頭的,浪蕩囝
共銬,共鎖起來
連鞕有一種無仝的聲音
對頂頭,對四箍輾轉
包圍過來喝放,放去
這敢人生,愛放下的道理
19
貓咪來溪邊散步
軁過山苳蒿,扒菖蒲的草仔籽
貓咪,阿爸有時陣小可仔
放鬆,順頭前溪行向海口
溪水嗤舞嗤呲,天頂
虎豹獅象假做雲尪跟蹤
貓咪,頭前溪本底是輕鬆的
進行曲,唱予鯽仔魚溪哥仔聽
唱予稻穗飽滇,風中跳舞
這馬變做絞滾的吶舌歌
貓咪,島嶼的四箍輾轉
有誠濟溪河出海
溪埔地有大栱仙挨絃仔
有白翎鷥跳芭蕾,貓咪
汝愛相信,遮是美麗的寶島
20
1968年,戒嚴的機器
繼續織高級的亞麻布
紩媠氣的布袋,兼繡
一葩橫逆的花
一个大寒的暗暝,無講無呾
彼條布袋線閣紩過來
阿爸,怹搝1947年
紩阿嬤的彼條布袋線
紩一本檢舉冊,一疊宣傳單
Popeye卡通我誠愛看
彼當時機器用戒嚴法織政治詩
共柏楊紩入去布袋
阿爸愛讀特殊的冊,袂曉寫詩
汝的布袋,哪會紩匪諜的標誌
21
貓咪,彼種古早的老曲盤
親像用汝的跤爪,磨老歌
有時跳曼波,有時
磨出悲哀的溪流
貓咪,阿爸公平正義的鎖練
108式的白鶴拳
吱吱叫折磨,化做石烌
飛上烏陰的山頂
夜婆,規暝咻咻叫
佇頭殻內踅玲瑯,揣無
窗仔門飛出去
貓咪汝敢知,這是一个偌爾
悲慘的世界
22
阿爸,汝的骨頭烌已經
回轉來故鄉的塗底
汝的肉體袂閣疼痛
阿爸,若閣提出汝佇綠島
寄轉來的108張批
四四正正的家書,無雜質
閣頓幾若粒印仔,證明
批的清白
一堆有目屎痕跡,帶鹹味
共苦難豉佇心肝底的文字
親像死去的𧌄蜅蠐,袂出聲
攏參汝的骨頭烌囥做伙
阿爸汝敢知,讀著這文字
我也哭袂出聲
23
來,我挲汝光滑的毛絲
貓咪,阿爸予國家的機器教化
修理甲金爍爍,焦涸涸的
心肝窟仔, 塗石流過的胸坎
連欲囥磅子的橐袋仔都無
阿母做雜差,紩布袋,束瓜笠
囡仔一个一个,休學,退學
仝款的布袋線,牽連
一家人的運命
貓咪,布袋針
鑿入阿母的心,紩憂鬱症
厝內祭拜的關公
猶原恬恬看冊,土張飛攬大刀
佇後面徛挺挺
貓咪,頭前溪的水
日夜無停,寬寬仔流過
24
阿爸,汝孤身人
一隻老鐵馬,布袋揹孤島
行佇西海岸
阿爸彼時陣,我知影
五个歹年冬,凌治甲
身軀遛一重皮
孤島的草木齊蔫去
阿爸,汝敢無聽著我喝聲
鐵馬無鞍,無跤蹄
目睭神神,佇西海岸
向北,向北,直直行
25
貓咪,島嶼的西海岸
鯤鯓,是大海的記認
安平海沙埔,有平安防風林
看向天頂,一群黃金膨鼠
走相逐,海翁也浮上水面
共怹噴水滾耍笑
貓咪,阿爸佇海岸神神
親像失去記持
大海,大海
阿爸的喝聲,予痟狗湧吞落
吐出來,霧佇海沙埔
貓咪汝看,安平的日頭
照常平安落海
一群漁船寬寬仔入港
海鳥互相報平安
26
貓咪,阿爸鐵馬繼續輾
城西的樹林規海岸
月娘予烏雲崁一半
星光幌來幌去,變做掃帚
共齷齪掃去天涯海角
汝敢有看著,馬鞍藤已經睏去
麻黃仔的頭毛幔甲規頭規面
海風吹來,垃儳的世事颺颺飛
汝敢有聽著,樹林內傳來
十萬隻台灣蟬,咭咧,咭咧
哭海的聲
27
貓咪汝看,拄拍殕仔光
䖙踮海沙埔的鐵馬
予馬鞍藤的花蕊叫精神
故鄉的召喚順海湧溢過來
先人跤跡恍恍,若有若無
昨暝佇曾文溪口看流星
的海鳥,雄雄規群飛上天
阿爸攑雙手喝咻,肩頭也變做翼股
大力擛落擛落
貓咪,國聖燈塔四肢
已經沕落水,目睭猶原眨眨𥍉
阿爸徛佇肉粽角,越頭看海沙崙
予吐血絲纏牢的海埔姜
拚命滾躘,也是走袂去
28
貓咪恬恬,看咱島嶼的海岸線
東爿的溪流走向西,一逝一逝
瀉落大海
七股溪,將軍溪,急水溪
一片一片的海埔新生地
海茄苳的樹葉反過來
親像阿爸的尻脊骿,透露
鹹歰的人生
水筆仔佇水面寫文字
句句,袂堪得回想的過去
流出去,攏流出去
對肩胛,手捗,生命線流出去
阿爸神神看海口
親像必巡的空喙,日頭焦蔫
溪流也漚爛去
29
貓咪汝敢知,幾若暝日彎彎斡斡
命運的布袋線,閣牽倚來北掌溪南岸
阿爸,這個溪口是汝夢中
上大的空喙
阿爸,汝擔頭看向溪的彼爿
虎豹獅象,雲尪傱來傱去
怹的跤蹄號,攏是阿公的血跡
貓咪汝看,魚塭仔一窟一窟
親像魚仔開喙,講人話
有賰,永遠有賰,永遠有雙春
阿爸,汝像遐枯焦的麻黃仔
規身軀賰一枝骨
阿爸,汝敢若一跤空空的布袋
已經無賰半項
30
阿爸,汝想起
布袋蓮滿溪面的神秘景緻
一萬蕊媠媠的鳳眼
早起活靈靈暗時謝去
十萬肢青春的手
對空虛的布袋伸出來
向日頭公喝咻
怹連鞭予人拖去挕掉
揹的罪孽,是足𠢕生湠
予四箍輾轉的性命
攏袂快活
阿爸,汝拜的神明托夢
汝的命,是布袋命
31
阿爸,汝認命
毋閣向前行
阿爸,敢無聽著遙遠的所在
貓咪輕輕仔叫,司奶的聲
阿爸,我細漢時陣
綁兩支毛尾仔,小可紅牙
幼麵麵,阿爸
汝挲毛尾仔,講像貓咪
貓咪是我的偏名
阿爸,汝牽牛花纏規身
跳上竹棑仔
倒直直,親像一跤凹凹的布袋
也敢若一隻對忠心失望的狗
共家己放水流
32
順八掌溪口的掣流
剪過台灣海峽風湧
阿爸,阮一大陣搜救的船隻
親像走揣,漂浮佇海面
做人的義理
阿爸,我是毋驚水的貓咪
我問紅樹林的大栱仙,問
雲尪,問飛懸飛低的海鳥
我合掌,向神祈禱
我看著噴水煙火的海翁
泅向布袋港,我目睭瞌瞌
神啊,阿爸敢是布袋線
閣牽對阿公彼爿去
33
1946年,橫霸霸的布袋
共阿公扛去坮
一萬隻夜婆飛入布袋港
三暝三日無離開
這陣,阿爸的竹棑仔向西
閣踅向北爿去
化做翼股的肩胛浮雲頂
故鄉的鳥隻綴規陣
大海唱出哀悲的歌詩
月娘探頭出來,布袋港
雄雄開喙喝聲
竹棑仔顫一下,㧎佇岸邊
阿爸,彼台故障的曲盤
重再轉起來,用溪水的聲音
奏一條大海漂流記
貓咪仆佇汝的胸坎
阿爸,三魂七魄緊轉來
34
阿爸,汝的身魂沓沓仔勇健
想起大海茫茫烏雲滿天
彼時,有一道爍爁光顯顯
阿公佇雲頂伸手
共竹棑仔掰向岸邊
阿爸,汝的性命
是島嶼美麗的海岸線
風湧拍起來,連鞭退落去
阿爸,八掌溪掣流的險惡
一刀一刀刻入義渡碑
世間的公平正義,終其尾
會佇烏暗中,顯出來
35
海岸的花蕊
聽大海安眠曲落眠
天光開目繼續生湠
牽牛仔花共阿爸牽轉來
一个毋驚艱苦
拍拚的阿爸,重再徛起
佇有鳳凰起飛的大樓
阿爸是鋩鋩角角的警衛
守護一个城堡的暗暝
予囡仔行入童話故事
歡喜睏去,阿爸
汝講海邊的肉粽角擋海湧
樹木吸收鹽飛沙
攏是島嶼的守護神
36
台灣海峽的水湧繼續漲流,洘流
烏面抐桮十月落南,四月上北
島嶼的風雲有時變色,有時清清
日子一工一工過
阿爸的翅股早就仆仆
苦難的記持鎖佇鐵櫃內
生蜘蛛絲,一直到甲
1987年
大樓的退伍軍人老阿伯
雙手攑懸懸,肩胛撇咧撇咧
親像海鳥的翅股
怹挨挨陣陣,飛去海峽的彼爿探親
阿爸的頭殻,雄雄相拍電
匪諜,生鉎的兩个紅字
雷公爍爁閃袂離
37
2001,小可通,2008,大三通
阿爸的記持重再旋藤
挕掉的薰盒仔閣捧出來
阿爸,聽貓咪講
身體顧予好,聽好食百二
貓咪,汝的毛尾仔
有一簇細細蕊的白花
是鹽,抑是雪
阿爸,心情放冗
來看布袋戲
唷呼,西北派的妖道雄雄出現
叮叮噹噹,賣唱生魔音奏若去
貓咪,布袋港八角寮仔的布袋線
紩一世人,布袋蓮探頭出來
鳳眼開目隨瞌去,敢是一種幸福
38
貓咪,我的身軀燒炥炥
胸坎內兩跤布袋,蓮花窒甲滇滇
烏面抐桮變做鳳凰,一隻一隻飛出來
阿爸,天主疼惜汝
好人會去坐伊身邊
貓咪,共命運紩甲密喌喌的布袋
抽一條線,用來放風吹
會吹去佗位
阿爸,汝喀喀叫無元氣
䖙落歇睏,莫閣講話
39
阿爸,七月十四彼一暝
汝攝脯的性命
突然變甲金滑圓滿,坐起來
汝衰微的眼神
雄雄掰開雲煙,炤出來
像北極星的光
向這個世界的四箍輾轉
上落尾,掃描一回
阿爸阿爸,規病房的目睭
攏變水沖,發出哀哭的聲
阿爸的布袋線斷去
風吹,飛向天堂
40
貓咪原在仆佇窗仔墘
七月風颱,壓過六月的梅雨
海邊的鹽水霧,無講無呾
楔入心內,必裂的玻璃
阿爸,我閣來八掌溪
水筆仔,規身軀花
等十月落筆
欲共汝的一生寫做
一首足長,足長的詩
阿爸,我欲共詩放水流
予規个大海攏讀著
予規天頂鳥隻攏聽著
閣予雲尪
紮去上帝的身邊