作者/邱湘雲
今年文學獎,客語散文複審名單總共有7篇。大體來看,主題方面,「懷 舊」、「懷人」、回想「頭擺」个文章還係較多;恁樣个主題愛寫著好、寫著「不同凡響」並不容易。題材方面,可能係這幾年「新冠疫情」个病痛經驗,寫親人「發病」、「過身」,自家「蹛院」摎「離別」个過程也較多見。「生、老、病、死」,摎親人分別个痛腸總係恁「刻骨銘心」,用散文寫來像形梳理自家心中个傷痛,在描述過程當中也得到「療傷止痛」个效果。
「散文」係展現「行雲流水」个敘事功力,愛用流掠个客語來形容晢象个情感也實在無簡單:毋過有兜雖然客語寫來已順,但係斯像平常講話共樣,並無結構、修辭這兜文學个經營,恁樣就變做「講古」,並毋係「文學創作」了。「口頭語言」摎「書面語言」還係有無共樣个所在,想恩俚一路里來提倡「客語文學」,外人還會長透笑講:仰讀來「有客語」嗄「無文學」?所以不只愛顧到客語語詞个運用,莫忘「文學性」个展現正係這當中最重要个。
這擺客語散文愛選出一篇最好个文章。五位評審第一輪投票各自推薦2篇, 續等評審輪等講自家推薦个原因。發言過程當中,無想著大家「英雄所見略 同」,第二輪投票大家一同認為〈永久个頭擺〉這篇打頭名。
〈永久个頭擺〉係寫從細爺哀離婚,自家仰般行過這人生一段晦暗个成 人長大个過程,主題切合社會生活所見。得獎原因係因為佢當有「文學性」, 比論講寫心理情感,像「掛念」、「孤栖」、「失落」等等,佢會「化虛為 實」,當「形象化」、當有「畫面感」。再來就係文章當中「比喻」、「象 徵」个手法也運用到已熟絡,像會將「煩惱」比做「玫瑰花个竻」,「寂寞」 比做「大地一片荒涼」,也會用「囥人尋」象徵「阿姆毋見忒、尋毋著了」。 雖然寫心中甘苦个事情,但到包尾還會有轉折:「味緒苦苦个記憶,帶來了溫 柔个光」,這種「點滴在心頭」个散文寫來到當幼路,所以得著所有評審个阿腦摎推薦。