作者/王昭華
詩佮小說掠外,就是散文矣。今年臺語散文進入複決審的10篇作品,臺文 表現攏有到分,不而過猶是加減有一屑仔華文的瑕痕。10篇內容方向不一,2 篇論事說理,語言的政治認同佮動物保護,攏是目今真切要的議題;地誌遊記1 篇,寫離島海景;總是,數念親友的題材也是占較大面。
得獎的〈白頭鵠仔〉,哀悼一位過身一冬的畫家好友,二十外年的交情 注入文字,抾幾段故人痟狂的心適代,佮插伊對創作的見解,「音容宛在」毋 是寫佇輓聯的成語爾,一篇散文嘛通寫甲「音容宛在」:臺文書寫才袂走去的 「音」,予不在的故人會當一直「在」。
若一部運鏡風格勻勻仔是的電影,〈白頭鵠仔〉是一首輓歌,悲傷厚薄節 了誠拄好。對夢中的白頭鵠仔,到性命紀念園區的白頭鵠仔,是踅一个圓,嘛是箍一字零。