作者/呂美親
英國頭一位駐臺外交官Robert Swinhoe(1836-1877,斯文豪),佇1856 年頭一擺來到臺灣了後,看著臺灣有真濟特別的動物,自按呢深深痴迷,也來開始伊的冒險佮採集。
這首敍事長詩〈跤跡〉,以第二人稱的形式來講出 Swinhoe佇臺灣冒險的「跤跡」。詩對成做博物學家Swinhoe的晚年開始鋪 排,寫伊恬恬坐佇倫敦泰晤士河邊,那咧遙想臺灣的心境。毋過,因為用第二人稱,就若親像作者迒過時空來到伊的身軀邊,佮伊對話。紲落來佮伊做伙記 持彼段佇臺灣的青春,或者是講作者綴Swinhoe的記持,佮伊鬥陣轉去到伊對 英國坐船來到臺灣,傱入彼段美麗的冒險。轉去到彼當時,作者綴Swinhoe行 佇深山林內咧「tsîn」遐个珍貴閣活躘躘的動物,抑Swinhoe若親像隨時化身做 伊所發見的每一款動物,袂輸規个人就活佇遐的樹林中間。
佇詩的冒險內面,作者綴Swinhoe重新經歷原始的臺灣,也提出反省著家己對島嶼的古早傳說遐爾生份。親像「小心跟綴你的跤步,一步一步/行對島嶼的心內去。你講/……」按呢的話句,因為是第二人稱的形式,也提醒讀著這首詩、讀著Swinhoe的冒險的讀者,以及作者家己,毋通袂記得伊佇臺灣行踏的跤跡,閣有遐的濟濟跤跡的重要性佮意義。
這首長詩,不時有聲,定定有影,讀者心內有回音,振動的畫面嘛隨時浮佇目睭前。詩句有長有短,親像跤步有大細,跤跡有較明佮較霧的;猶閣作者無刁工佇逐句押韻,煞也真自然就表現出臺語的敍事本身所「話」出來的韻律佮節奏。閣較難得的經營是,詩遐爾長,扣掉段落的閬逝,攏總是127逝,總是佇每一段攏是佮主題敆峇的描寫,攏是Swinhoe佇臺灣四界所行踏的跤跡。尤其這首長詩前後呼應,準是Swinhoe已經因為重病袂振袂動,干焦會當佇泰晤士河邊咧遙想佇臺灣的跤跡,總是因為彼寡跤跡佮記持,予伊因為家己揣著的新鳥隻,伊的靈魂也變做彼隻飛鳥,會得自在飛轉去到少年時彼个踏查冒險的路裡。這是一首真好的詩。