阿土伯企在十字路口。紅青燈歸下晝咧,佢還在該位踩踩踏踏1 ,行上行下。恁多年來,佢逐擺經過該隻路口,老毛病一定就會發作。目盯盯仔看等來來去去个車仔,魂魄就像跈車仔南來北往東飄西走,分人載去天遠路頭2 ,佢這下就剩著一個肉身空殼仔。像冥冥之中有一隻手,牽等佢,行出社區大門後,動啊著3 佢就會重複行到該位去。
重複,係一種病。去看先生,先生講阿土伯个壓力忒重,正會得著這種病,病名安做「精神官能症」。先生个話,莊頭莊尾大家都毋信,認為這個先生畫虎膦,四兩人講半斤話。阿土伯賣田之後,衫袋仔脛脛飽飽,有錢人比神仙較快樂。這下个大學生,畢業後薪水正二三十K,手指頭扚扚算算,一生人都賺毋贏阿土伯。也有人講這個醫生盡沒常識,摎烏龜硬講係鱉,湖鰍仔長長就話著係蛇哥,聽到這種症斷,上家下屋這兜鄰舍,實在毋知係愛噭,也係笑好。
「好轉屋咧啦!」路過一個熟識人,大聲胲喊佢。
阿土伯發下癡驚,忽然間精神起來。轉過頭看較真兜,係阿財。在阿土伯田吂賣个時節,佢兩儕个田,就隔等一條田脣兩相連。
「好轉咧啦!時代啦!雙手堵毋核大水壩。你愛想較開兜啦!」阿財騎等機車,噗噗噗響等,停在十字路口等紅青燈。愛走个時節,又再夠較大聲喊阿土伯:「看開兜,遽遽好轉屋!」阿財心想,阿土伯一定企在十字路口異久咧,日頭斜斜落山,臨暗頭後,斷烏就來。
阿土伯微微笑一下,看阿財走遠,又續等行上行下,像囊妮仔,從正手片飛到左手片,又前前後後飛來飛去,捩半晝邊都捩毋出該隻十字路口。阿土伯就像在連峨接棟4 个新社區肚走無路去,還有一種可能,就係阿土伯又尋毋到轉夜个路。
阿土伯尋毋到轉夜个路,這件事情,早在十幾年前,警察局就有案底。該年,縣政府擎起一支拼經濟个大旗仔,開始故鄉第一期个都市計畫。藍曬圖攤開來,就像佈下天羅地網,阿土伯个祖田,一坵田都走毋忒,完完全全分縣政府劃落市中心。佢緊看公告圖,心肝緊哱哱跳,目珠皮掣毋停,就像有一種不祥个徵兆。成隻月後,縣政府公文來了,愛召開公聽會。阿土伯戴一頂笠嫲,著一身做事衫,打赤腳,摎阿財湊等共下去縣政府大禮堂,聽官廳个大計畫。
1踩踩踏踏:拿不定主意。音cai11 cai11 tab5 tab5